Polshada F-16 joıǵysh ushaǵy apatqa ushyrady

ASTANA. KAZINFORM — Oqıǵa eldiń ortalyq bóligindegi Radom qalasynda boldy. Bul týraly BBC habarlaıdy. 

— Radomdaǵy qaıǵyly oqıǵa: áýe shoýyna daıyndyq kezinde F-16 joıǵysh ushaǵy qulady. Ókinishke qaraı, ushqysh qaza boldy, — dep jazdy H áleýmettik jelide Polsha úkimetiniń baspasóz hatshysy Adam Shlapka.

Polsha bıliginiń málimetinshe, jerde zardap shekkender joq. Qaıǵyly oqıǵanyń túsirilimine qaraǵanda, ushaq ushý-qoný jolaǵyna qulap, ushqysh katapýltanyp úlgermegen. 

Euronews aqparatynsha, polıak áskerı ushqyshy AirShow Radom halyqaralyq avıashoýy aldynda jattyǵý ushýy kezinde qaza tapty. Polıak Aýmaqtyq qorǵanys kúshteriniń habarlaýynsha, ol polıak áskeriniń ofıtseri bolǵan.

Aldyn ala málimet boıynsha, ushqysh F-16 joıǵysh ushaǵyn basqaryp, joǵary pılotaj fıgýralaryn oryndady. Manevr kezinde ushaq kenetten tómendeı túsip, joǵary jyldamdyqpen áýejaı mańynda jerge qulaǵan. Apattan keıin ushaq otqa orandy. Qaıǵyly oqıǵa ornynan túsirilgen kadrlar áleýmettik jelilerde jergilikti ýaqyt boıynsha saǵat 20:00 shamasynda paıda boldy.

Budan buryn Polshanyń burynǵy densaýlyq mınıstri KVI shekteýlerine baılanysty soqqyǵa jyǵylǵanyn jazdyq.