Polshada Dımash jankúıerleriniń kezdesýine 400-den astam adam jınaldy
ASTANA. KAZINFORM — 17 qazanda ICE Kraków kongress ortalyǵynda Dımash Qudaıbergenniń Polshadaǵy alǵashqy kontsertine jáne jańa DIMENSIONS álemdik týrynyń ashylýyna oraı jankúıerler kezdesýi ótti. Polshalyq fan-klýb uıymdastyrǵan PreParty keshine túrli elden 400-den astam adam jınaldy.
Krakovqa Qazaqstan, Qyrǵyzstan, Chehııa, Slovakııa, Rýmynııa, Germanııa, Ýkraına, Norvegııa, Fınlıandııa, Italııa, Frantsııa, Aýstrııa, Ispanııa, Kanada, Belarýs, Kolýmbııa jáne ózge de elderden Dears keldi. Kontsert qarsańynda olar dostarymen júzdesip, pikirles jandarmen tanysyp, polıak halqynyń qonaqjaılyǵyn sezinip, keshti birge ótkizý múmkindigine ıe boldy.
Polshalyq fan-klýbtyń negizin qalaýshylar Tereza Kakol men Monıka Vasılevskaıa qatysýshylarǵa quttyqtaý sóz arnady. Al ánshiniń ata-anasy Qanat jáne Svetlana Aıtbaevtar merekelik keshtiń arnaıy qonaqtary boldy.
Kesh uıymdastyrýshylary qonaqtardy Polshanyń mýzyka jáne bı dástúrlerimen tanystyratyn baǵdarlama ázirledi. Krakus ujymy zalǵa polonez áýenimen kirdi. Merekelik baǵdarlama halyq bıleri men ázil-syqaq qoıylymdaryna ulasyp, keıin kórermender ónerpazdarmen sýretke túsip, birge án shyrqady. Sondaı-aq kezdesý qatysýshylary Krakovtyń tanymal nyshandarynyń biri — Laıkonıkpen de júzdesti.
Baǵdarlamada birneshe jyldan beri Dımashtyń ánderin kavermen usynyp júrgen polshalyq fan-klýbtyń DiVoices horynyń ónerine erekshe oryn berildi. Bul keshte ár túrli tilde, sonyń ishinde qazaq tilindegi ánder da shyrqaldy. «Mahabbat ber maǵan» ánin oryndaý kezinde horǵa Svetlana Aıtbaeva men Rasýl Ýsmanov qosyldy.
Kesh Polshanyń taýly óńirlerindegi halyq mádenıetin tanytatyn «Morskie Oko» gýral ansambliniń ónerimen jalǵasty. Ujym sahnaǵa shyqqan sátte DiVoices horynyń músheleri ansamblmen birge «Hej, bystra woda» ánin oryndady.
Aıta ketelik Polshada ánshini qarsy alýǵa 10-nan asa eldiń jankúıeri kelgen edi.
