Polshada balmuzdaq satylǵan dámhana astynan 900 jyl burynǵy shirkeýdiń qaldyqtary tabyldy
ASTANA. KAZINFORM — Polsha arheologtary Gdansk qalasynyń ortalyǵyndaǵy Sýkennıcheı kóshesi mańynda júrgizilgen qazba jumystary kezinde aǵash shirkeýdiń qaldyqtaryn anyqtady.
Mamandardyń aldyn ala baǵalaýynsha, ǵıbadathana shamamen 1140 jyly salynǵan. Bul merzim rastalsa, ol Polsha aýmaǵynan tabylǵan osy tıptegi eń kóne aǵash shirkeý bolmaq.
Arheologtar shirkeýden bólek, aǵashtan salynǵan turǵyn úılerdiń qaldyqtary men ortaǵasyrlyq zıratty da tapqan. Zertteýshilerdiń málimetinshe, ǵımarattyń keıbir qurylymdary 1,5 metrge deıingi bıiktikte saqtalǵan. Alaıda nysannyń edáýir bóligi áli de kórshi kósheniń astynda jatyr.
Gdansk bıligi saqtalǵan qurylymdardy aınalasyndaǵy tarıhı qabatpen birge qazyp alyp, konservatsııalaý múmkindigin qarastyryp jatyr. Keıin kóne jádigerdi kópshilik nazaryna usyný josparlanyp otyr. Mamandardyń pikirinshe, mundaı tásil erte orta ǵasyrlarǵa tıesili biregeı tarıhı eskertkishti bolashaq urpaqqa saqtap qalýǵa múmkindik beredi.
Burynǵy balmuzdaq satatyn dámhana ornalasqan aýmaqta arheologııalyq zertteýler 2023 jyldan beri júrgizilip keledi. Buǵan deıin munda ortaǵasyrlyq jerleý oryndary men XIII ǵasyrǵa tıesili tas qulpytastar tabylǵan. Alaıda aǵash shirkeýdiń anyqtalýy qazba jumystary barysynda jasalǵan eń mańyzdy jańalyqtardyń birine aınaldy.
Aıta keteıik, buǵan deıin Otyrar qalashyǵynan XIII-XVIII ǵasyrlarǵa tıesili qundy jádigerler tabylǵanyn jazǵanbyz.
