Polshada 100% daýys óńdeldi — Navrotskıı jeńdi

ASTANA. KAZINFORM — Karol Navrotskıı Polshanyń jańa prezıdenti bolady, dep habarlaıdy Kazinform menshikti tilshisi.

Polsha BAQ habarlaýynsha, prezıdent saılaýynyń ekinshi týryndaǵy daýystardyń 100 paıyzy óńdelgen. «Quqyq jáne ádilet» ókili K.Navrotskıı 50,89 paıyz (10 606 628 daýys), al onyń qarsylasy, Varshava meri Rafal Tshaskovskıı 49,11 paıyz (10 237 177 daýys) jınady.

Saılaýǵa daýys berýshilerdiń 71,6 paıyzy qatysty. Buǵan deıin Varshava ýaqytymen saǵat 01:00–degi jaǵdaı boıynsha ekzıt-poll Varshava meri, lıberal Rafal Tshaskovskıı ultshyl Karol Navrotskııden sál alda ekenin kórsetken.

Alaıda daýystardy tolyq sanaý K.Navrotskııdiń jeńisin kórsetti. Qorytyndy rastalyp, resmı jeńimpaz «Quqyq jáne ádilet» ókili bolsa, bul «Azamattyq platforma» degen basqa partııanyń ókili premer-mınıstr Donald Týsk úshin saıası jaısyzdyq bolmaq.

Buǵan deıin Polshadaǵy prezıdent saılaýyna tartysqa túskender qandaı ýáde bergeni týraly jazǵan bolatynbyz.