Polshada 1 sáýirden bastap zeınetaqy tómendeıdi
ASTANA. KAZINFORM — Polshada 1 sáýirden bastap osy jyly zeınetkerlik jasqa jetken azamattardyń zeınetaqysy azaıady. Bul týraly Fakt basylymy habarlaıdy, dep jazdy BELTA.
Mundaı ózgeris Áleýmettik saqtandyrý basqarmasy (ZUS) jańa kesteler boıynsha zeınetaqyny esepteıtin bolǵandyqtan júzege asady. Ózgerister 1966 jyly týǵan áıelder men 1961 jyly týǵan erlerge qatysty bolady. Bul adamdar úshin jańa zeınetaqy jylyna birneshe júz zlotıden azaıýy múmkin.
Zeınetaqyny eseptegende ZUS ár azamattyń jınaqtalǵan qarajatyn onyń ómir súrý uzaqtyǵyna bóledi.
Jańa erejeler 2026 jyldyń 1 sáýirinen bastap kelesi jyldyń 31 naýryzyna deıin zeınetaqyǵa ótinish bergen adamdarǵa qoldanylady.
Zeınetaqynyń tómendeýi Polshadaǵy ómir súrý qunynyń aıtarlyqtaı ósýi jaǵdaıynda bolady. Elektr jáne gaz baǵasynyń qymbattaýy turǵyndardyń shyǵyndaryn arttyrsa, janar-jaǵarmaı baǵasy da rekordtyq deńgeıge jetip otyr.
Aıta keteıik, Frantsııa parlamenti zeınetaqy reformasyn toqtatýdy qoldady.