Polsha prezıdenti SAFE kredıttik baǵdarlamasyna qatysý týraly zańǵa veto qoıdy
ASTANA. KAZINFORM - Bul zań jobasy Varshavaǵa Eýroodaqtyń «Eýropanyń qaýipsizdigin qamtamasyz etýge baǵyttalǵan áreketter» (SAFE) baǵdarlamasy aıasyndaǵy qarajatqa qol jetkizýge múmkindik berer edi, dep habarlaıdy Euronews.
Polsha prezıdenti Karol Navrotskıı elge Eýroodaqtyń shamamen 44 mıllıard eýro kólemindegi qorǵanys nesıelerin alýǵa jol ashatyn zańǵa veto qoıdy. Bul sheshim qorǵanys shyǵyndaryn qarjylandyrý máselesinde premer-mınıstr Donald Týsk úkimetimen aradaǵy saıası teketiresti kúsheıtti.
Atalǵan zań jobasy Varshavaǵa Eýroodaqtyń SAFE baǵdarlamasy aıasyndaǵy qarajatty paıdalanýǵa múmkindik beretin edi. Jalpy kólemi 150 mıllıard eýrony quraıtyn bul bastama qorǵanys shyǵyndaryn arttyrýǵa jáne Eýropanyń qorǵanys ónerkásibin nyǵaıtýǵa baǵyttalǵan.
Baǵdarlama aıasynda Polsha shamamen 43,7 mıllıard eýro kóleminde nesıe alyp, onyń eń iri benefıtsıary atanýy tıis bolatyn.
Donald Týsk jetekshilik etetin koalıtsııa zań jobasyn belsendi qoldady.
Úkimet ókilderiniń aıtýynsha, bul nesıeler 2022 jyldyń basynda Reseıdiń Ýkraınaǵa tolyq aýqymdy basqynshylyǵynan keıin kúsheıgen qaýipsizdik qaterleri jaǵdaıynda Polsha armııasyn jedel jańǵyrtýǵa qolaıly qarjylandyrý kózin qamtamasyz eter edi.
Resmı tulǵalar bólinetin qarjy qorǵanys salasyndaǵy birqatar jobany qoldaýǵa baǵyttalatynyn aıtty. Olardyń qatarynda eldiń shyǵys shekarasyn nyǵaıtý jáne Polsha aýmaǵynda qarý-jaraq óndirisine ınvestıtsııa salý bar.
Alaıda Navrotskıı Eýroodaq nesıelerine súıený Varshavanyń Brıýsselge táýeldiligin arttyrýy múmkin ekenin málimdedi. Onyń ornyna prezıdent qorǵanys salasyndaǵy ınvestıtsııalardy eldiń ishki resýrstary esebinen qarjylandyrýdy usyndy. Sonyń ishinde ortalyq banktiń rezervterinen túsetin kiristi paıdalaný múmkindigi týraly aıtyldy.
Donald Týsk mınıstrler kabınetiniń arnaıy otyrysyn ótkizetinin habarlady. Onda nesıeni maquldatýdyń balama joldaryn usynbaq. Buǵan deıin premer-mınıstr úkimet Polshaǵa SAFE baǵdarlamasynyń qarajatyna qol jetkizýge múmkindik beretin «V josparyn» daıyndap jatqanyn aıtqan bolatyn.
Osyǵan deıin Polsha shyǵysyndaǵy áýe keńistigin 2026 jyldyń maýsymyna deıin jabatyny týraly jazdyq.
