Polsha prezıdenti Konstıtýtsııalyq sottyń kúshpen basyp alynǵanyn málimdedi
ASTANA. KAZINFORM — Polsha prezıdenti Karol Navrotskıı Varshavada Konstıtýtsııalyq sottyń kúshpen basyp alynǵanyn jáne eldegi konstıtýtsııalyq tártiptiń buzylǵanyn málimdedi. Bul málimdeme sot ǵımaraty mańynda bolǵan qaqtyǵystar aıasynda jasaldy, dep habarlaıdy Kazinform agenttigi TASS-qa silteme jasap.
TASS málimetinshe, Polsha prezıdentiniń málimdemesin onyń ákimshiliginiń basshysy Pavel Shefernaker oqyp bergen.
— Sol túni Polsha Respýblıkasynyń konstıtýtsııalyq tártibi buzylyp, memlekettik konstıtýtsııalyq organ kúshpen basyp alyndy, — dep keltiredi Navrotskııdiń sózin Business Insider ınternet-portaly.
Buǵan deıin Polsha prezıdenti Konstıtýtsııalyq sot tóńiregindegi janjalǵa baılanysty parlamenttik partııa ókilderimen shuǵyl keńes ótkizetinin habarlaǵan.
Eldegi shıelenis premer-mınıstr Donald Týsktiń óz úkimetinde buryn mınıstr bolǵan Macheı Berekti Konstıtýtsııalyq sot sýdıasy etip taǵaıyndaý týraly sheshiminen keıin bastaldy. Keıingi aptalarda sot ǵımaratynyń aldynda narazylyq aktsııalary turaqty túrde ótip kelgen.
31 qazanǵa qaraǵan túni jaǵdaı ýshyǵa tústi. Sot ǵımaratynyń aýmaǵyn kúzetý úshin qosymsha kúshter tartyldy. Narazylyq bildirýshiler Konstıtýtsııalyq sot ǵımaratynyń aldyna jınalyp, qorshaýdan ótýge árekettengen. Osydan keıin aktsııaǵa qatysýshylar men polıtsııa qyzmetkerleri arasynda qaqtyǵys boldy.
Buǵan deıin 30 qazan kúni keshke Karol Navrotskıı Polsha Konstıtýtsııalyq sotynyń mindetin atqarýshy tóraǵasy Bogdan Svenchkovskııdiń qyzmetinen shettetilýine baılanysty Senegalǵa saparyn toqtatyp, Varshavaǵa keri qaıtqanyn jazǵan edik.
Varshavaǵa oralǵan soń prezıdent Joǵarǵy sottyń birinshi tóraǵasy Zbıgnev Kapınskıımen kezdesti.
Jergilikti ýaqyt boıynsha tún ortasynda (Máskeý ýaqytymen 02:00–de) Navrotskıı Konstıtýtsııalyq sot ǵımaratyna kelip, ishke kirgen. Sol kezde kireberiste turǵan jáne memleket basshysyn ótkizgisi kelmegen sýdıalarmen janjal týyndaǵan.
Oqıǵa vıdeojazbaǵa túsip, ony sýdıa Macheı Berek jarııalady. Sonymen qatar polıtsııa men prezıdenttiń kúzet qyzmetkerleri arasynda da qaqtyǵys bolǵan.
