Polsha prezıdenti Konstıtýtsııalyq sottaǵy jaǵdaıǵa baılanysty Senegalǵa saparyn toqtatty
ASTANA. KAZINFORM — Polsha prezıdenti Karol Navrotskıı Konstıtýtsııalyq sot aýmaǵyna polıtsııa kelgenin jáne sot tóraǵasy Bogdan Svenchkovskıı qyzmetinen shettetilgenin bilgen soń, Senegalǵa baǵyt alǵan ushaǵyn keri buryp, eline oraldy. Bul týraly Kazinform Reuters agenttigine silteme jasap habarlady.
— Mundaı sátte prezıdent Polshada bolýy kerek. Senegalǵa bara jatqan saparymdy toqtatyp, elge qaıtyp jatyrmyn, — dep jazdy ol X áleýmettik jelisinde.
Polıtsııanyń málimetinshe, qyzmetkerler Konstıtýtsııalyq sot ǵımaratynyń mańynda bolǵan oqıǵalardan keıin onyń aýmaǵyna barǵan. Atap aıtqanda, quqyq qorǵaý organdarynyń qyzmetkerlerine qaýipti zattar laqtyrylǵan.
Konstıtýtsııalyq sottyń saıtynda juma kúni onyń tóraǵasy Bogdan Svenchkovskııdiń mindetin atqarýdan shettetilgeni týraly aqparat jarııalandy.
Konstıtýtsııalyq sot tóńiregindegi uzaqqa sozylǵan saıası janjal mekemeniń jumysyn is júzinde toqtatyp tastaǵan.
Keıingi aptalarda Konstıtýtsııalyq sot ǵımaratynyń aldynda oppozıtsııa ókilderi narazylyq aktsııalaryn ótkizip jatyr. Buǵan premer-mınıstr Donald Týsktiń óz úkimetinde buryn mınıstr bolǵan Marchın Berekti osy sottyń sýdıasy etip taǵaıyndaý týraly sheshimi sebep bolǵan.
30 qazanda Polsha ádilet mınıstri Valdemar Jýrek Konstıtýtsııalyq sot tóraǵasynyń mindetin atqarýshy Bogdan Svenchkovskııdi qyzmetinen shettetý týraly ótinish joldady.
Eske salaıyq, buǵan deıin Polshada premer-mınıstrge shabýyl jasamaq bolǵan kúdikti ustalǵany jóninde jazǵanbyz.
