Polsha parlamentiniń ókilderi Qazaqstanǵa saparlap keldi
ASTANA. KAZINFORM – 18-21 mamyr aralyǵynda Astanada «Polsha – Qazaqstan» parlamenttik dostyq toby delegatsııasynyń sapary ótedi. Bul týraly QR Syrtqy ister mınıstrliginiń resmı ókili aıtyp berdi.
Sapar aıasynda Qazaqstannyń zań shyǵarýshy jáne atqarýshy bılik ókilderimen birqatar kezdesýler josparlanǵan.
Atap aıtqanda, QR Parlamenti Májilisinde dostyq tobynyń qazaqstandyq bóliginiń tóraǵysy Snejanna Imashevamen, sondaı-aq QR Parlamenti Senatynda dostyq tobynyń qazaqstandyq bóliginiń tóraǵasy Andreı Lýkınmen kelissózder ótkizý kózdelgen.
– Sapar aıasynda polıak delegatsııasy birqatar mádenı-gýmanıtarlyq jáne ınnovatsııalyq nysandarmen de tanysady. Atap aıtqanda, «ALJIR» memorıaldyq-murajaı keshenine, «Alem.AI» jasandy ıntellekt ortalyǵyna, sondaı-aq polıak dıasporasynyń ókilderi tyǵyz qonystanǵan Aqmola oblysynyń Petrovka aýylyna barý josparlanǵan, – dedi QR SІM ókili elordada ótken brıfıngte.
Sapar parlamentaralyq dıalogty odan ári nyǵaıtýǵa, gýmanıtarlyq yntymaqtastyqty keńeıtýge jáne Qazaqstan men Polsha arasyndaǵy ekijaqty qatynastardy damytýǵa yqpal etedi dep kútilýde.
Buǵan deıin Polsha prezıdenti Karol Navrotskıı elge jańa Konstıtýtsııa qajet ekenin málimdegen edi.
