Polsha Olımpıada komıtetiniń basshysy úsh aıǵa qamaýǵa alyndy
ASTANA. KAZINFORM – Polshanyń Katovıtse qalasyndaǵy sot eldiń Olımpıada komıtetiniń basshysy Radoslav Pesevıchti úsh aıǵa qamaýǵa alý týraly prokýratýranyń ótinishin qanaǵattandyrdy, dep habarlaıdy Deutsche Welle.
Buǵan deıin Pesevıch alaıaqtyq jáne aqshany jylystatý isi boıynsha tergelip jatqan Zondacrypto krıptovalıýta bırjasyna qatysty is aıasynda ustalǵan bolatyn.
Tergeý derekterine sáıkes, Zondacrypto 2025 jylǵy qazanda Polsha Olımpıada komıtetiniń demeýshisi atanǵan.
Polıak BAQ-tarynyń málimetinshe, Radoslav Pesevıch kompanııanyń burynǵy basshysy Pshemyslav Kraldan quny 40 myń eýro bolatyn saǵatty syılyq retinde alǵan degen kúdik bar. Jýrnalıstik zertteýlerde Pesevıch buǵan jaýap retinde kásipkerdiń múddesin Polshanyń burynǵy premer-mınıstri Mateýsh Moravetskıımen qarym-qatynas kezinde ilgeriletkeni aıtylady.
dpa agenttiginiń málimetinshe, Pesevıch Kraldyń múddesin Polshanyń Básekelestik jáne tutynýshylar quqyǵyn qorǵaý basqarmasynyń tóraǵasy aldynda da qorǵaǵan degen kúdikke ilingen.
Olımpıada komıteti basshysyna qatysty ekinshi aıyp krıptobırjanyń bankrotqa ushyraýy aldyndaǵy jaǵdaıǵa baılanysty. Tergeý nusqasy boıynsha, ol kompanııadaǵy baılanystaryn paıdalanyp, krıptovalıýta shottarynan shamamen 200 myń eýro shyǵaryp alǵan bolýy múmkin.
Pesevıch taǵylǵan aıyptardy joqqa shyǵaryp otyr. Onyń aıtýynsha, qymbat saǵat úshin aqshany birneshe bólikpen qolma-qol tólegen.
– Men 200 myń eýro joǵalttym, saǵattyń aqshasyn tóledim. Sonda men neni moıyndaýym kerek? – degen Pesevıchtiń sózin dpa agenttigi keltirdi.
Zondacrypto krıptobırjasyn 2014 jyly polshalyq kásipker Sılvestr Sýshek qurǵan. Ol kezde kompanııa BitBay dep atalǵan.
2022 jyly Sılvestr Sýshek jumbaq jaǵdaıda joǵalyp ketkennen keıin kompanııany basqarý Pshemyslav Kralǵa ótti. Tórt jyldan soń Kral klıentter aldyndaǵy tólem mindettemelerin oryndamaı, shetelge qashyp ketken.
Qazir Polsha prokýratýrasy Zondacrypto qyzmetine qatysty alaıaqtyq jáne aqshany jylystatý baptary boıynsha tergeý júrgizip jatyr. Іs boıynsha keltirilgen shyǵyn kólemi 80 mln eýroǵa baǵalanyp otyr.
Aıta keteıik, Norvegııa hanshaıymynyń uly qamaýǵa alynǵany habarlandy.
