Polsha kompanııasy Qazaqstanda quny 69 mlrd teńge bolatyn jylyjaı keshenin salady

ASTANA. KAZINFORM - Aýyl sharýashylyǵy mınıstri Aıdarbek Saparov pen Fabe Polska kompanııasynyń basqarma tóraǵasy Fatıh Býdan jylyjaı salasyn damytýǵa baǵyttalǵan iri jobany iske asyrý jónindegi ınvestıtsııalyq kelisimge qol qoıdy.

Joba aıasynda Shymkent qalasynda jylyna 38 myń tonna qyzanaq óndiretin zamanaýı jylyjaı keshenin salý josparlanyp otyr. Jobanyń jalpy ınvestıtsııa kólemi shamamen 69 mlrd teńgeni quraıdy.

Kezdesý barysynda Aıdarbek Saparov jobanyń agroónerkásiptik keshendi damytýdaǵy strategııalyq mańyzyn atap ótti.

- Memleket basshysy ınvestıtsııa tartý máselelerine, onyń ishinde agrarlyq sektorǵa erekshe nazar aýdaryp keledi. Atalǵan jobanyń iske asyrylýy ımportty almastyrýǵa jáne eldiń eksporttyq áleýetin arttyrýǵa tikeleı yqpal etedi.

Qazaqstanda zamanaýı jylyjaı tehnologııalaryn engizýge barlyq jaǵdaı jasalǵan: qolaıly ınvestıtsııalyq ahýal, memlekettik qoldaý jáne sapaly ónimge degen joǵary suranys aýqymdy óndiristi damytýǵa berik negiz qalyptastyrady.

Mınıstrlik jobany iske asyrýdyń barlyq kezeńderinde — qurylystan bastap tolyq qýatqa shyqqanǵa deıin — jan-jaqty qoldaý kórsetýge daıyn, — dedi mınıstr.

Óz kezeginde Fatıh Býdan jobany iske asyrý barysynda zamanaýı agrotehnologııalar, energııany únemdeýge baǵyttalǵan sharalar jáne óndiristik protsesterdi basqarýdyń turaqty damý jónindegi halyqaralyq standarttarǵa saı júıeler qoldanylatynyn atap ótti.

Onyń aıtýynsha, joba óndiristik tıimdilikti arttyryp, naryqty sapaly ónimmen turaqty qamtamasyz etýge múmkindik beredi.

- Sonymen qatar, buǵan deıin qol qoıylǵan ózara túsinistik týraly memorandým aıasynda Fabe Polska kompanııasy aldaǵy bes jyl ishinde Qazaqstannyń agroónerkásip keshenine shamamen 137 mln AQSh dollary kóleminde ınvestıtsııa salýdy josparlap otyr,-delingen habarlamada.

Osyǵan deıin elimizdiń aýyl sharýashylyǵy ónimderi 15-ten asa elge eksporttalatyny týraly jazdyq.