Polsha qalalarynda mıgratsııaǵa qarsy júzge jýyq sherý ótti

ASTANA. KAZINFORM – Polshada ımmıgratsııalyq saıasatty qatańdatýdy jáne shekaralardy jabýdy talap etken aýqymdy narazylyq aktsııalary ótti, dep habarlaıdy Euronews .

El boıynsha 80-nen astam qalada «Immıgratsııany toqtataıyq» uranymen sherýler ótti. Barlyǵy 100-ge jýyq qoǵamdyq aktsııa tirkelgen.

Narazylyq sharalaryn ýltraońshyl baǵyttaǵy «Bostandyq pen táýelsizdik konfederatsııasy» partııasy uıymdastyrǵan.

Alańǵa shyqqandardyń negizgi talaptary - Polshanyń Lıtva, Ýkraına, Belarýs jáne Slovakııamen aradaǵy shekarasyn jabý jáne shekaralyq baqylaýdy qatańdatý. Partııa kóshbasshylarynyń biri Kshıshtof Bosak Varshavada ótken sherý kezinde sóz sóılep, el úkimetiniń otstavkasyn talap etti. Sonymen qatar ol shekarany zańsyz kesip ótkenderge áskerılerge oq atý quqyǵyn berýdi usyndy.

Antıımmıgratsııalyq sherýler Varshava, Krakov, Poznan, Vrotslav, Belostok jáne basqa da qalalarda ótti. Kóshege qatań kóshi-qon saıasatyn jaqtaıtyndar ǵana emes, ýltraońshyl urandarǵa qarsy shyqqan belsendiler de jınaldy.

Varshava, Katovıtse jáne Olshtynda ótken aktsııalar barysynda jurt bosqyndardyń quqyqtaryn qorǵaýdy jáne toleranttylyqty qoldaý qajettigin de urandatty.

Narazylyqtar 7 shildede Polsha Germanııa jáne Lıtvamen birge shekaralyq baqylaýdy engizgennen keıin kúsheıgen. Qazirgi tańda Polsha-Germanııa shekarasynda 52 baqylaý pýnkti, Polsha-Lıtva shekarasynda 13 baqylaý pýnkti jumys istep tur. Buǵan qosa, Polsha EO-nyń bes elimen birge baspana berý sharttaryn qatańdatý týraly kelisimge qol qoıǵan bolatyn.

Osyǵan deıin habarlaǵanymyzdaı, Tramp Obamany 2016 jylǵy saılaýda alaıaqtyq jasady dep aıyptady.