Polsha Izraılden óz azamattaryn evakýatsııalamaq

ASTANA. KAZINFORM – Izraıldegi Polsha azamattaryn aldymen avtobýspen Iordanııaǵa jetkizip, artynan Varshavaǵa jiberedi, dep habarlaıdy Kazinform menshikti tilshisi.

Polshanyń Syrtqy ister mınıstrligi Izraılden 200-ge jýyq azamatyn evakýatsııalaıtynyn málimdedi. Polsha Iranmen Izraıl arasyndaǵy qarym-qatynas ýshyǵyp bara jatqan tusta mundaı qadamǵa baryp otyrǵan EO-daǵy alǵashqy el bolyp otyr.

- Bizdiń boljamymyz boıynsha, aldaǵy 1-2 táýlikte evakýatsııaǵa daıyn bolamyz. Operatsııa barysynda negizinen týrıster men Izraılge az ýaqytqa kelgen polıaktar evakýatsııalanady, - dep málimdedi tilshilerge syrtqy ister mınıstriniń orynbasary Genrıka Mostsıtska-Dendıs.

Izraıl 13 maýsym kúni Irannyń ıadrolyq jáne áskerı nysandaryna soqqy bergen soń eki el bir-birine ushqyshsyz ushatyn apparattardy qoldana otyryp úzdiksiz shabýyldap jatyr.

Jeksenbiniń keshindegi málimetter boıynsha, áýe soqqylarynyń saldarynan Izraılde keminde 14 adam, al Iranda 224 adam mert boldy.

Eýroodaqtyń ózge memleketteri Izraılge barýdan bas tartýǵa shaqyryp jatqanda Polsha óz azamattaryn evakýatsııalaýdy bastaǵan birinshi el bolyp otyr. Polsha azamattary aldymen Iordanııaǵa jetkizilip, artynan Varshavaǵa jolǵa shyǵady. Izraıldiń áýe keńistigi jabyq.

Osy sátte Eýroodaq basshylary taraptardy tynyshtyqqa shaqyryp, shıelenisti beıbit jolmen sheshýge úndedi.

Alaıda Izraıldiń AQSh-taǵy elshisi jeksenbi kúni beıbit kelisimge qarsy ekenin aıtyp: «Bizdiń maqsatymyz soǵysty toqtatý emes, jeńiske jetý»,-dedi.

Osyǵan deıin Iran men Izraıl arasyndaǵy úzdiksiz soqqydan taǵy birneshe adam qaza tapqany týraly jazdyq.