Polsha fermerleri EO men MERKOSÝR kelisimine qarsy jappaı narazylyqqa shyqty
ASTANA. KAZINFORM — Polshalyq agrarshylar Ońtústik Amerıkadan arzan ónimderdiń jappaı aǵylyp kelýinen qaýiptenip otyr. Bul Eýropalyq odaqtaǵy aýylsharýashylyq ónimderi baǵasynyń tómendeýine jáne jergilikti fermerlerdiń tabysynyń azaıýyna alyp kelýi múmkin, dep habarlaıdy Euronews.
Juma kúni Polshanyń túkpir-túkpirindegi qalalarda fermerler EO men MERKOSÝR arasyndaǵy kelisimge qarsy narazylyq bildirý úshin kóshege shyqty.
Varshavada eldiń ár óńirinen kelgen demonstranttar qala ortalyǵy arqyly júrip ótip, aldymen Seım ǵımaratyna, keıin premer-mınıstrdiń keńsesine bet aldy. Buǵan deıin birneshe júz traktor astanaǵa qaraı jol tartqan, alaıda olardy qalaǵa kireberiste toqtatty.
Euronews-ke bergen suhbatynda Pomor voevodstvosynan (Polshadaǵy eń joǵary deńgeıdegi ákimshilik-aýmaqtyq birlik) kelgen sharýa narazylyqqa qatysýshylardyń ne sebepti ashýly ekenin túsindirdi.
«Biz munda Eýroodaq basshylyǵyna qarsylyǵymyzdy bildirý úshin keldik. Sońǵy 20-30 jylda biz belgilengen standarttarǵa saı, anaǵurlym paıdaly azyq-túlik ónimderin óndire bastadyq. Al búgin sol Odaqtyń ózi barlyq osy normalardy buzyp, bizge blokqa kirmeıtin elderden jáne Ońtústik Amerıkanyń túrli memleketterinen taýarlardy ákele bastady», dep shaǵymdandy ol.
Buǵan deıin, juma kúni, prezıdent Karol Navrotskıı fermerlermen Prezıdent saraıynda kezdesti.
Aıta keteıik, Eýropalyq odaq pen MERKOSÝR — Ońtústik Amerıkanyń birqatar elderin biriktiretin blok. Bul uıymdar arasyndaǵy saýda kelisimi Polshada jáne EO-nyń basqa da elderinde kóp jyldan beri daý men qarsylyq týǵyzyp keledi. 25 jylǵa sozylǵan kelissózderden keıin bul kelisim qazir EO-ǵa múshe memleketter men Eýroparlamenttiń maquldaý satysynda tur.
Eske sala ketsek, buǵan deıin Ulybrıtanııada pabtar salyqtyń ósýine narazylyq retinde saıasatkerlerdi kirgizbeı jatqanyn jazdyq.