Polsha EO soty men MERKOSÝR arasyndaǵy kelisimge qarsy sotqa shaǵym túsirdi
ASTANA. KAZINFORM — Polsha Eýropalyq Odaq (EO) pen MERKOSÝR (Argentına, Brazılııa, Paragvaı jáne Ýrýgvaı kiretin saýda-ekonomıkalyq birlestik) arasyndaǵy erkin saýda týraly kelisimge qarsy EO sotyna shaǵym joldady. Bul týraly Polskie Radio-ǵa silteme jasap, BELTA habarlady.
Habarǵa sáıkes, Varshava shaǵymmen birge kelisimniń sot sheshimi shyqqanǵa deıin ýaqytsha toqtatylýyn talap etken ótinish te bergen. Polsha bıligi qujat sot talqylaýy aıaqtalǵanǵa deıin kúshine enbeýi tıis dep esepteıdi.
Polsha bul kelisimdi basynan bastap synǵa alyp kelgen. Negizgi syndardyń biri — «aına tárizdi talaptardyń» bolmaýy, ıaǵnı EO men MERKOSÝR elderiniń aýyl sharýashylyǵy óndirýshilerine birdeı standarttardyń qoldanylmaýy. Varshavanyń pikirinshe, bul Ońtústik Amerıka fermerlerine básekelestik artyqshylyq berip, Eýropa fermerlerine teris áser etýi múmkin.
EO men MERKOSÝR arasyndaǵy erkin saýda kelisimi 17 qańtarda Paragvaıda qol qoıylǵan. Ol 1 mamyrdan bastap kúshine endi. Qujat shamamen 700 mıllıon adamdy qamtıtyn aýqymdy erkin saýda aımaǵyn qurýdy jáne ónerkásip, qyzmet kórsetý jáne aýyl sharýashylyǵy salalaryndaǵy tarıfterdiń shamamen 90%-yn kezeń-kezeńimen joıýdy kózdeıdi. Kelisimdi, ásirese, Germanııa jáne Soltústik Eýropanyń birqatar elderi qoldaǵan, olar Ońtústik Amerıka naryǵyna óz ónimderiniń qoljetimdiligin keńeıtýdi kózdeıdi.
Polshaǵa qosa, buǵan deıin Frantsııa, Vengrııa, Avstrııa jáne Irlandııa da bul kelisimge qarsy shyqqan. Eýroparlament depýtattary 21 qańtarda EO sotyna júginip, kelisimniń EO normalaryna sáıkestigin tekserý jóninde rezolıýtsııa qabyldaǵan.
Aıta keteıik, Polshada 5 jylda jumyssyzdyq deńgeıi artty.
