Polsha Baltyq teńizinde alǵashqy teńiz jel stantsııasyn salyp jatyr
ASTANA. KAZINFORM – Kómirge eń táýeldi elderdiń biri sanalatyn Polsha endi ekologııalyq taza energııaǵa bet burmaqshy, dep jazdy Euronews.
36 mıllıon halqy bar Polsha kezinde elektr energııasynyń negizgi bóligin kómir arqyly alyp kelgen. Búginde Eýroodaqtyń aýyspaly tóraǵasy retinde Polsha qazba otynǵa táýeldilikti azaıtýdy kózdep otyr.
Premer-mınıstr Donald Týsktiń úkimeti eldiń ońtústigindegi tıimsiz shahtalardy birtindep jabýdy josparlap otyr. Al eldiń Baltyq jaǵalaýyndaǵy soltústigi jańartylatyn energetıkada serpilis kezeńi bastaldy.
Premer-mınıstr keńsesiniń hatshysy Ignatsıı Nemchıtskıı Euronews arnasyna bergen suhbatynda jel elektr stantsııasynyń qyzmet etý merzimi 30 jylǵa deıin jetetinin jáne bul joba Polshanyń energetıkalyq aýysýynda mańyzdy ról atqaratynyn aıtty:
– Bizde endi kómir joq ári biz úshinshi elderden ımportqa táýeldi bolǵymyz kelmeıdi, – dedi Nemchıtskıı.
Onyń aıtýynsha, polıak ekonomıkasy úshin jańartylatyn energııa kózderine, atom energetıkasyna jáne gazǵa ınvestıtsııa salý – energetıkalyq júıeniń turaqtylyǵyn qamtamasyz etýdiń tıimdi joly.
Baltic Power — Polshadaǵy jetekshi teńiz jobasy
Bul joba ORLEN men kanadalyq Northland Power kompanııalarynyń birlesken kásiporny. Elektr stantsııasy Baltyq jaǵalaýyndaǵy Hochevo men Leba qalalaryna jaqyn, jaǵalaýdan 23 km jerde ornalasqan. Jobanyń jalpy qýaty 1140 megavattqa jetedi dep kútiledi. Bul shamamen 1,5 mıllıon polıak úı sharýashylyǵyn elektrmen qamtamasyz etýge múmkindik beredi.
Atom energetıkasy da kún tártibinde
Polsha tek jańartylatyn energııamen shektelip qalmaıdy. Elde alǵashqy atom elektr stantsııasyn salý jospary burynǵy «Quqyq pen ádilettik» (PiS) partııasy úkimeti kezinde bastalyp, qazirgi premer Donald Týsktiń koalıtsııasy arqyly jalǵasyn taýyp otyr.
Sonymen qatar, Nemchıtskıı Polshanyń shaǵyn modýldi reaktor (SMR) jobalaryn qarastyryp jatqanyn jáne Kanadadaǵy pılottyq jobalardy jiti baqylap otyrǵanyn aıtty. Mundaı reaktorlar 300 megavattqa deıin energııa óndire alady.
– Aldaǵy 15 jylda Polsha energetıkalyq júıesinde aıtarlyqtaı ózgerister bolady. Atom energetıkasy negizgi qýat kózine aınalsa, jańartylatyn energııa men gaz ıkemdilik pen turaqtylyqty qamtamasyz etedi, – dedi Nemchıtskıı.
Aıta keteıik, maýsymda Karol Navrotskıı Polshanyń jańa prezıdenti bolyp saılanǵan bolatyn.