Polsha 2026 jyly Eýropadaǵy eń kúshti armııany qurmaq
ASTANA. KAZINFORM — Polsha premer-mınıstri Donald Týsk 2026 jyly Polsha Eýropadaǵy eń qýatty armııa qurýdy tezdetetinin málimdedi, dep habarlaıdy Anadoly.
Polsha memlekettik TVP telearnasy Týsktiń 2026 jylǵa arnalǵan boljamymen bólisti.
Premer-mınıstrdiń aıtýynsha, bul jyl Polsha úshin damý qarqynyn jedeldetý jyly bolady.
— Úkimet áskerı kontıngentti keńeıtý, iri ınfraqurylymdyq jobalardy júzege asyrý jáne ónerkásipti qalpyna keltirý, onyń ishinde qorǵanys salasyn damytý boıynsha jumystardy jalǵastyrady, — dep atap ótti ol.
Týsk málimdemesinde memlekettik satyp alýlar salasynda «Polsha — bárinen buryn» prıntsıpi qoldanylatynyn da aıtty.
— Biz Eýropadaǵy eń kúshti armııany qurýdy tezdetemiz. Biz ınfraqurylymǵa iri ınvestıtsııalardy jedeldete alamyz, — dep qosty premer-mınıstr.
Premer-mınıstr 2026 jyly qylmyspen kúresti qatańdatýdy josparlap, Polsha qalaı bolǵanda da «qaýipsizdik oazısi» bolyp qala beredi degen senimin bildirdi.
Sondaı-aq, Týsk 2025 jyly Polsha ekonomıkalyq ósimdi jyldamdatyp, iri ınvestıtsııalar bastalǵanyn aıtyp, 2026 jyl el úshin ońtaıly jáne tabysty bolatynyna úmit bildirdi.
Budan buryn 2060 jylǵa qaraı Polshanyń halqy 25%-ǵa azaıýy múmkin ekenin jazǵan edik.