Polsha 20 eýro banknotynda Marııa Kıýrıdiń tolyq esimin kórsetýdi talap etti

ASTANA. KAZINFORM — Polsha ǵylym jáne joǵary bilim mınıstri Martsın Kýlasek Eýropalyq ortalyq bankke resmı hat joldap, Nobel syılyǵynyń laýreaty Marııa Sklodovskaıa-Kıýrıdiń tolyq esimin jańa 20 eýro banknotynda kórsetýge shaqyrdy, dep jazady AZERTADJ.

Bul týraly Polshanyń ǵylym jáne joǵary bilim mınıstrligi habarlady.

Mınıstrdiń aıtýynsha, tek «Marie Curie» dep jazý — tarıhı ádiletsizdik jáne Polsha tarapynan ǵylym men mádenıetke qosqan úlestiń moıyndalmaýy bolyp sanalady. 

— Marııa Sklodovskaıa-Kıýrıdiń tolyq esimi men tegin banknotada kórsetý – bul jaı ǵana resmılik emes, bul bizdiń ortaq eýropalyq bolmysymyzdy, tarıhymyz ben muramyzdy moıyndaýdyń sımvoly. Biz onyń shyqqan tegin umytpaýǵa jáne Polshanyń álemdik ǵylymǵa qosqan úlesin kórsetýge mindettimiz, — dep atap ótti ol Eýropalyq ortalyq bank basshysy Krıstın Lagardqa jazǵan hatynda.

Mınıstrlik eske salǵandaı, bastapqy banknot dızaınynda tek frantsýzsha «Marie Curie» esimi kórsetilgen. Bul jaǵdaı Polshada jáne halyqaralyq qoǵamdastyqta synǵa ushyrady. Hatta sondaı-aq Mıgel de Servantes pen Lıýdvıg van Bethoven sııaqty tulǵalar ózderiniń túpnusqa esimderimen beınelengeni aıtylyp, Marııa Sklodovskaıa-Kıýrıge de dál sondaı qurmet kórsetilýi tıis ekeni basa aıtylǵan.

Politico basylymynyń dereginshe, Eýropalyq ortalyq bank «Eýropalyq mádenıet» taqyrybyndaǵy jańa banknot serııasyn ázirlep jatyr. Marııa Sklodovskaıa-Kıýrı — ǵylym salasynda eki túrli Nobel syılyǵyn alǵan jalǵyz áıel jáne banknotqa beınelenýi múmkin úmitkerlerdiń biri. Buǵan deıin Polshanyń Ulttyq bankiniń tóraǵasy Adam Glapınskıı de Eýropalyq ortalyq bankke osy másele boıynsha resmı hat joldaǵan.

Buǵan deıin Polshada 25 myńnan asa mańyzdy nysandy sýretke túsirýge tyıym salynatyny belgili boldy.