Polpharma Santo qazaqstandyq dári-dármekti Eýropaǵa eksporttaı bastady
ShYMKENT. KAZINFORM – Birneshe jylǵa sozylǵan daıyndyq pen eýropalyq sertıfıkat Shymkenttegi Polpharma Santo zaýytyn Eýroodaq naryǵyna shyǵardy. Qazaqstanda jasalǵan sıtaglıptın dárisiniń 7,8 myń qaptamasy Bolgarııaǵa jóneltildi.
Іc-sharaǵa Shymkent qalasynyń ákimi Ǵabıt Syzdyqbekov, kásiporyn basshylary men jumysshylary, seriktester qatysty. Ekinshi tıpti qant dıabeti aýrýyna em bolar sıtaglıptın dárisin endi sheteldikter de tutynady. 100 mg dozadaǵy dári-dármek ishki naryqqa ǵana emes, eksportqa baǵyttalyp otyr. Ol úshin kásiporyn óndiris jelisin jańartty, sapany baqylaý jáne qadaǵalaý salasynda eýropalyq talapty engizdi ári barlyq mindetti oryndady. Sóıtip 2025 jyly zaýyt Eýroodaqtyń GMP sertıfıkatyn ıelendi. Polpharma Santo málimetine súıensek, osy standartqa sáıkestigin rastaǵan Ortalyq Azııadaǵy alǵashqy farmkásiporyn boldy.
— Qazaqstandyq dári-dármekti Eýropalyq odaq elderine jóneltý — tarıhı sát. Shaǵyn ǵana qoraptaǵy dárini daıyndaý úshin shamamen 500 adam eńbek etti. GMP sertıfıkatyn alý jumysynyń ózi úsh jylǵa sozyldy. Munyń bári ne úshin kerek? Kóp adam osy suraqty qoıdy. Búgin onyń jaýaby daıyn. Qazaqstanda daıyndalǵan dári-dármek Eýropa elderinde de qoljetimdi bolady, — dedi Polpharma Santo-nyń bas dırektory Adam Alekseıýk.
Іs-shara kezinde dári-dármektiń alǵashqy toptamasy júk kóligine tıeldi. Ondaǵan jyl boıy bul dári elimizge Eýropa, AQSh, Ońtústik Koreıa jáne ózge elderden jetkizilse, endi Shymkentte óndiriledi, eksporttalady.
— Biz dári-dármek jóneltýdi Bolgarııa elinen bastadyq. Onda sıtaglıptınge suranys bar. Búgin 7 800 qaptama jiberemiz. Ózge elderge jiberý týraly sheshim keıin qabyldanady. Bir ǵana dárini tasymaldaý arqyly da Qazaqstannyń eksporttyq áleýetin arttyra alamyz, — dedi kompanııanyń bas dırektory.
Kompanııa 2026 jyly qańtar aıynda 30-dan astam preparatty óndirýdi ıgerýdi kózdeıtin ınvestıtsııalyq kelisimshart jasady.
— Sıtaglıptın biryńǵaı dıstrıbıýtordyń satyp alý júıesine engizildi jáne elimizdegi dárihana jelisine jetkiziledi. Endi endokrınolog dárigerlermen jumys istep, qant dıabetine shaldyqqan adamdardy emdeý kezinde qoldanýdy usynamyz, — dedi A. Alekseıýk.
Aıta keteıik, Shymkenttegi farmatsevtıka zaýyty 1882 jyldan beri jumys istep tur. 2011 jyly Polpharma halyqaralyq tobyna endi. Sodan beri jańǵyrtýǵa $130 mln ınvestıtsııa salynǵan. Qazir zaýytta 1,4 myń adam eńbek etedi. Munda 14 terapııalyq baǵytta 380 dári-dármek shyǵady. Al GMP sertıfıkaty ishki suranysty qamtyp, shetel naryǵyn jaýlaýǵa múmkindik beredi.
