Polpharma Qazaqstandaǵy farmatsevtıka salasyn qalaı damytyp jatyr
ASTANA. KAZINFORM – Sońǵy jyldary Qazaqstan otandyq farmatsevtıka óndirisin damytý men dárilik qaýipsizdikti nyǵaıtýǵa basymdyq berip keledi. Bul baǵytta memleketpen birge jumys istep kele jatqan halyqaralyq ınvestorlardyń biri – Polpharma toby. Kompanııa sońǵy 15 jyl ishinde Qazaqstandaǵy qyzmetin damytýǵa 130 mln AQSh dollarynan astam ınvestıtsııa salyp, óndiristi halyqaralyq standarttarǵa saı jańǵyrtty. Búginde elimizde qoldanylatyn dári-dármektiń árbir besinshi qaptamasyn shyǵarady. Sonymen qatar kásiporyn óndiris kólemin ulǵaıtyp qana qoımaı, jańa tehnologııalardy engizýge, mamandar daıarlaýǵa jáne Qazaqstannyń eksporttyq áleýetin arttyrýǵa da qarjy quıyp keledi.
Polpharma tobynyń Qazaqstandaǵy farmatsevtıka salasyn damytýǵa qosqan úlesi memleket tarapynan da joǵary baǵalanyp otyr. Memleket basshysy Qasym-Jomart Toqaev QR Prezıdenti janyndaǵy Sheteldik ınvestorlar keńesiniń XXXVIII plenarlyq otyrysy aıasynda Polpharma tobynyń Baqylaý keńesiniń tóraǵasy Ejı Starakty II dárejeli «Dostyq» ordenimen marapattady. Bul marapat onyń Qazaqstannyń farmatsevtıka salasyn damytýǵa, densaýlyq saqtaý júıesin nyǵaıtýǵa jáne zamanaýı dárilik preparattardyń qoljetimdiligin arttyrýǵa qosqan kópjyldyq eńbegine berilgen joǵary baǵa boldy.
Elordada ótken baspasóz konferentsııasynda Ejı Starak bul marapatty óziniń ǵana emes, búkil ujymnyń eńbegine berilgen baǵa dep qabyldaıtynyn atap ótti.
– Bul marapatty dostyq pen ózara senimniń belgisi dep qabyldaımyn. Bul – meniń ǵana emes, kún saıyn patsıentterdiń densaýlyǵy úshin eńbek etip júrgen Polpharma toby men Polpharma Santo-nyń eńbegine berilgen baǵa. Qazaqstanǵa 15 jyldan beri ınvestıtsııa salyp kelemiz. Sondyqtan qazaqstandyq patsıentterdiń densaýlyǵy úshin úlken jaýapkershilik sezinemin, - dedi ol.
Qazaqstan – uzaq merzimdi seriktes
Polpharma Santo búginde Qazaqstandaǵy eń iri dárilik preparat óndirýshilerdiń biri sanalady. Shymkenttegi kásiporynda elimizde qoldanylatyn dári-dármektiń árbir besinshi qaptamasy óndiriledi. Kompanııa 1400-ge jýyq adamdy turaqty jumyspen qamtyp otyr.
Kompanııa portfelinde 14 terapııalyq baǵyt boıynsha 380-nen astam dárilik preparat bar. Sońǵy 15 jyl ishinde ampýlalar men ınfýzııalyq eritindiler, antıbıotık untaqtary, sondaı-aq tabletka men kapsýla sııaqty dárilik ónimder óndirisi tolyq jańǵyrtyldy. Innovatsııalar jáne sapa ortalyǵy, sondaı-aq Tsıfrlyq ınjenerlik bilim berý ortalyǵy iske qosyldy. Búginde óndiris GMP jáne GDP halyqaralyq standarttaryna tolyq sáıkes keledi. 2025 jyly Polpharma Santo Eýropalyq Odaqtyń GMP sertıfıkatyn alǵan Ortalyq Azııadaǵy alǵashqy kompanııa atandy. Bul kásiporynǵa Eýropalyq Odaq naryǵyna shyǵýǵa jáne eksporttyq áleýetin keńeıtýge múmkindik berdi.
Ejı Staraktyń aıtýynsha, Qazaqstan Polpharma úshin jaı ǵana naryq emes.
– Biz úshin Qazaqstan – jaı ǵana naryq emes, uzaq merzimdi strategııalyq seriktes. Biz óndiristi damytýǵa, jańa tehnologııalardy engizýge jáne farmatsevtıka salasyndaǵy tájirıbeni jetildirýge turaqty túrde ınvestıtsııa salyp kelemiz. Osy arqyly Qazaqstannyń densaýlyq saqtaý júıesiniń turaqty damýyna úles qosýdy maqsat etemiz, – dedi ol.
Kompanııa Qazaqstandaǵy óndiristi keńeıtýdi jalǵastyryp keledi. 2026–2036 jyldarǵa arnalǵan, quny 60 mln eýro bolatyn ınvestıtsııalyq baǵdarlama aıasynda óndiristik qýat ulǵaıtylyp, halyqaralyq standarttarǵa saı jańa dárilik preparattar shyǵarylady. Sonymen qatar onkologııalyq, kardıologııalyq, ınfektsııalyq jáne sozylmaly aýrýlardy emdeýge, sondaı-aq týberkýlezge qarsy birqatar preparatty Qazaqstanda óndirý josparlanǵan.
Ejı Starak otandyq óndiristi damytýdyń mańyzy pandemııa kezinde aıqyn kóringenin atap ótti.
– Pandemııa kezinde búkil álem dárilik qaýipsizdiktiń memleket úshin qanshalyqty mańyzdy ekenin aıqyn ańǵardy. Shekaralar jabylǵanda syrttan dári jetkizý qıyndady. Sondyqtan ár memleket úshin óz aýmaǵynda dári óndirý – ulttyq qaýipsizdiktiń mańyzdy bóligi. Biz Qazaqstanda ómirlik mańyzy bar dárilik preparattardy shyǵaratynymyzdy maqtan tutamyz, - dedi ol.
Jasandy ıntellekt óndiristiń tıimdiligin arttyrýda
Baspasóz konferentsııasynda Polpharma toby engizip jatqan tsıfrlyq tehnologııalarǵa da erekshe nazar aýdaryldy.
Polpharma toby dırektorlar keńesiniń múshesi ári transformatsııa jáne tsıfrlandyrý tobynyń jetekshisi Fabrıtsıo Franchezıonyń aıtýynsha, jasandy ıntellekt búginde dárilik preparattardy ázirleýden bastap óndiristi basqarý men sapany baqylaýǵa deıingi kóptegen baǵytta qoldanylyp keledi.
– Tsıfrlyq transformatsııa – jaı ǵana trend emes. Bul - kompanııanyń uzaq merzimdi damý strategııasynyń mańyzdy bóligi. Jasandy ıntellekt ónim ázirleýdi jedeldetýge, óndiristik úderisterdi jetildirýge jáne durys sheshim qabyldaýǵa kómektesedi. Kompanııa óndiristegi derekterdi taldaý, úderisterdi modeldeý jáne sapany baqylaý úshin tsıfrlyq sheshimderdi paıdalanady. Mundaı tehnologııalar óndiristiń tıimdiligin arttyryp qana qoımaı, dárilik preparattardyń sapasyn jaqsartýǵa jáne patsıentterge qajetti dárini ýaqytyly jetkizýge múmkindik beredi, – dedi ol.
Fabrıtsıo Franchezıonyń sózinshe, Polpharma jasandy ıntellektini engizýmen qatar derekterdiń qaýipsizdigine de erekshe mán beredi jáne bul baǵyttaǵy jumysty Qazaqstanmen birlesip jalǵastyrýǵa nıetti.
– Qazaqstandaǵy óndiristi keńeıtý, jańa dárilik preparattardy ıgerý, mamandar daıarlaý jáne tsıfrlyq tehnologııalardy engizý – munyń bári Polpharma Santo-nyń eldegi uzaq merzimdi josparynyń bir bóligi. Biz derekterdiń qaýipsizdigine de erekshe mán berip otyrmyz. Aldaǵy ýaqytta da Qazaqstan farmatsevtıka salasyna ınvestıtsııa salý jáne densaýlyq saqtaý júıesin damytý baǵytyndaǵy jumystar jalǵasa beredi, - dedi ol.
Kompanııa óndiristi damytýmen qatar, salaǵa qajetti kadrlardy daıarlaýǵa da kóńil bólip keledi. Polpharma Santo Qazaqstannyń jetekshi joǵary oqý oryndarymen birlesip bilim berý baǵdarlamalaryn júzege asyryp, stýdentterdiń óndiristik tájirıbeden ótýine múmkindik beredi.
Sondaı-aq kásiporyn janynan ashylǵan Tsıfrlyq ınjenerlik bilim berý ortalyǵynda óndiristi avtomattandyrý, tsıfrlyq tehnologııalar jáne ınjenerlik baǵyttar boıynsha mamandar daıarlanady. Bul óndiristegi zamanaýı tehnologııalardy meńgergen qazaqstandyq kadrlardyń qalyptasýyna múmkindik beredi.
Osylaısha, Polpharma Santo Qazaqstandaǵy óndiristi keńeıtip qana qoımaı, jańa tehnologııalardy engizý, mamandar daıarlaý jáne otandyq farmatsevtıka salasynyń damýyna úles qosý baǵytyndaǵy jumysyn jalǵastyrýdy kózdep otyr.
