Polonıı Olımpıadasy: Qazaqstandyqtar úzdik ondyqtyń qatarynda
ASTANA. QazAqparat - Polshada sońyna jetken Búkilálemdik XIII Polonıı oıyndarynda Qazaqstan quramasy segizinshi orynǵa taban tiredi, dep habarlaıdy «QazAqparat» HAA tilshisi.
Polonıı Olımpıadasy dep atalyp ketken dástúrli oıyndar Krynıtsa-Zdrýı shıpajaıly qalashyqta uıymdastyryldy. Sporttyń 8 túrinen 23 memlekettiń 650 sportshysy ózara baq synasty. Atap aıtqanda, komandalar taý shańǵysy, short-trek, shańǵymen júgirý, snoýbord, nordıng, konkımen júgirý kópsaıysy, hokkeı men otbasyly estafeta saıystarynan ózara myqtyny anyqtady. 25 qazaqstandyq sporttyń 6 túrinen el namysyn qorǵady.
Jarys qorytyndysy boıynsha, Qazaqstan quramasynyń qorjynyna 8 medal tústi. Aleksandra Pavlenko men Valerıı Belınskıı snoýbordtan Polonıı oıyndarynyń jeńimpazy atandy. Sonymen birge, konkımen júgirý kópsaıysynan jáne short-trekten Bogdan Kýlakov quramamyzǵa eki altyn medal salyp berdi. Sonymen qatar konkıden Natalıa Kýlakova men Teıveld Dombrovskıı kúmis medalǵa ıe bolsa, Aleksandra Pavlenko men Teıveld Dombrovskıı quramanyń enshisine taǵy eki qola medal ákeldi.
Polonıı oıyndarynda jas boıynsha óziniń kategorııasynda úzdikterdiń qataryna Davyd Dobrovolskıı, Stas Dobrovolskıı, Anatolıı Kýlakov, Vlada Dobrovolskaıa, Marııa Kýlakova, ıÝnna Lopata, Veronıka Shatýrskaıa, Anna Dobrovolskaıa, Natalıa Kýlakova, Inessa Antropova, Nına Plıssenko (short-trek); Karına Belınskaıa (snoýbord); Anatolıı Kýlakov, Sergeı Levkovıch, Elmıra Orazgeldıeva jáne Inessa Antropova (konkımen kópsaıy) endi.
Aıta keterligi, jarys ótken ýaqytta Qazaqstan eki kún qatarynan medaldar sany boıynsha kóshbasshy bolyp turdy. Jarys sońynda, birinshi orynǵa - Chehııa, ekinshi orynǵa - Lıtva, úshinshi orynǵa Belarýs ornalasty. Tórtinshi tuǵyrdan Reseı kórinse, odan keıingi oryndardy Germanııa, AQSh, Shvetsııa, Qazaqstan, Vengrııa, Kanada men Norvegııa bólisti. 12-den 16-shy orynǵa deıin Latvııa, Avstrııa, Shveıtsarııa, Ýkraına, Islandııa men Bolgarııa jaıǵasty. Ispanııa, Irlandııa, Fınlıandııa, Avstralııa, Polsha men Moldovadan kelgen sportshylar medalsiz qaldy.
Eske sala ketsek, 2017 jyly Torýn qalasynda ótken Polonıı oıyndarynda Qazaqstan 11 medal (7 altyn) utyp alǵan bolatyn. Al 2016 jylǵy qysqy oıyndarda 9 medalǵa qol jetkizdi.
Aıta ketsek, Polonıı oıyndary 1934 jyldan beri 2 jylda bir ret ótkizilip keledi. Oǵan shetelde turyp jatqan ulty polıak azamattar qatysady. Sharanyń maqsaty - polıak birlestigin ıntegratsııalaý, tarıhı otanmen polıaktardyń baılanysyn nyǵaıtý. Al qysqy sport túrlerinen Polonıı oıyndary 1986 jyldan beri ótkizilip kele jatyr.
