«Polo» daýyly kúshine endi: Meksıka jaǵalaýyna qaýip tónip tur
ASTANA. KAZINFORM – «Polo» daýyly qysqa ýaqytta kúsheıip, 4-sanatqa jetti. Qazir onyń jeliniń maksımaldy turaqty jyldamdyǵy saǵatyna 240 shaqyrymǵa deıin jetip, daýyldyń 5-sanatqa jaqyndaýy boljanyp otyr. Bul týraly AQSh Ulttyq daýyl ortalyǵy habarlady.
Ortalyq málimetine súıensek, seısenbi kúni saǵat 09:00-degi jaǵdaı boıynsha «Polo» Meksıkanyń Sıýataneho qalasynan ońtústikke qaraı shamamen 345 shaqyrym jáne Mansanılo qalasynan ońtústik-shyǵysqa qaraı 555 shaqyrym jerde bolǵan. Daýyl shyǵys-ońtústik-shyǵys baǵytynda saǵatyna 9 shaqyrym jyldamdyqpen qozǵalyp kele jatqan.
Ulttyq daýyl ortalyǵynyń boljamynsha, «Polo» seısenbi kúni shyǵys-ońtústik-shyǵys baǵytynda qozǵalysyn jalǵastyryp, keıin seısenbi men sársenbi aralyǵynda baǵytyn kúrt ózgertip, soltústik-batys jáne batys-soltústik-batys baǵyttaryna bet alady. Aldaǵy birneshe kúnde daýyldyń negizgi bóligi Meksıkanyń ońtústik-batys jaǵalaýyna jaqyn mańda, teńizde saqtalady dep kútiledi.
Tekpan-de-Galeanadan Mansanıloǵa deıingi aýmaqta tropıkalyq daýyl týraly eskertý jarııalandy. Bul aımaqta sársenbi kúni tańerteńnen bastap tropıkalyq daýylǵa tán jaǵdaılar bolýy múmkin.
«Polo» daýyly beısenbige deıin Gerrero men Mıchoakan shtattarynyń jaǵalaýyndaǵy aýdandarǵa 100-200 mıllımetr jaýyn-shashyn ákelýi múmkin. Keı jerlerde jaýyn-shashyn mólsheri 300 mıllımetrge deıin jetýi yqtımal. Bul, ásirese, taýly jerlerde adam ómirine qaýip tóndiretin sý tasqyny men laı kóshkinderine ákelýi múmkin.
Ulttyq daýyl ortalyǵy Meksıkanyń ońtústik-batys jaǵalaýynyń keı bólikterinde adam ómirine qaýip tóndiretin bıik tolqyndar men keri aǵystar bolýy múmkin ekenin de eskertti.
Sonymen qatar Kalıfornııa túbeginiń ońtústik shetinen batys-ońtústik-batysqa qaraı ornalasqan «Odalıs» tropıkalyq daýyly da kúsheıip keledi. Ol seısenbi kúni nemese seısenbige qaraǵan túni daýylǵa aınalýy múmkin. Qazir onyń jaǵalaýǵa qatysty eshqandaı eskertýi jarııalanǵan joq.
Azor araldarynyń ońtústik-batysynda ornalasqan «Feı» tropıkalyq daýyly seısenbi kúni posttropıkalyq qaldyq tómen qysymdy aımaqqa aınalady dep kútiledi. Qazirgi ýaqytta oǵan baılanysty jaǵalaýda eshqandaı eskertý jarııalanbady.
Eske sala ketsek, buǵan deıin Japonııada «Dýtszıýan» taıfýny nóser jańbyr men laı kóshkinin týyndatyp, adam shyǵyny bolǵanyn jazdyq.
