Polkovnık Jantórınniń isi prokýrorǵa qaıtaryldy
ASTANA. QazAqparat - Aqtóbe garnızonynyń áskerı soty QR QK-niń 366-baby 3-tarmaǵy 4-tarmaqshasynda qarastyrylǵan qylmystyq is boıynsha aıyptalyp otyrǵan Aqtóbe oblysynyń Qorǵanys isteri jónindegi departamentiniń basshysy G.Jantórınniń isin qarady.
Buryn habarlanǵandaı, 14 maýsymda Aqtóbe oblysy boıynsha Sybaılas jemqorlyqqa qarsy is-qımyldar ulttyq bıýrosynyń departamenti Aqtóbe oblysynyń Qorǵanys isteri jónindegi departament basshysy, polkovnık G. Jantórındi ustady. Ol bopsalaý arqyly medıtsınalyq komıssııadan kedergisiz ótý, úmitkerlerdiń áskerı-tehnıkalyq mektepterge túsýine, áskerge shaqyrýdy keıinge qaldyrý jáne áskerı qyzmetkerlerge "qamqorlyq jasaımyn" dep udaıy aýdandyq qorǵanys isteri jónindegi bólim basshylarynan para alyp kelgen.
QR Áskerı sotynyń baspasóz qyzmetinen habarlaǵandaı, basty sot talqylaýyn taǵaıyndaý úshin kedergiler bar ekeni anyqtaldy.
Atalǵan qylmystyq is QR QPK-niń 623-baby 4-tarmaǵyna sáıkes aldyn ala tyńdalymǵa shyǵaryldy.
Alaıda sot protsessýaldy kelisimde kórsetilgen jazalaý mólsherimen kelispedi, óıtkeni QR QK-niń 366-baby 3-tarmaǵynyń 4-tarmaqshasyna alynǵan paranyń jetpis eselengen kólemdegi aıyppul salý qarastyrylǵan. Sondaı-aq sot qylmysty saralaýmen de de kelispedi.
Osylaısha sot qylmystyq isti prokýrorǵa qaıtardy.
Sot qaýlysy zańdy kúshine enbedi.
