Polıtsııanyń jańa «áriptesteri»: ShQO-da robot-ıtter patrýlge shyqty
ASTANA. KAZINFORM — Shyǵys Qazaqstan oblysy Ulan aýdanynda robot-ıtter alǵash ret qoǵamdyq tártipti kúzetýge shyǵa bastady, dep habarlaıdy Polisia.kz.
Ulan aýdanynyń Qasym Qaısenov kentinde ótken «Nomad Álemi» zamanaýı kóshpendiler mádenıetiniń aýqymdy festıvalinde azamattardyń qaýipsizdigin polıtsııa qyzmetkerlerimen qatar zamanaýı tehnologııalar da qamtamasyz etti.
Shyǵys Qazaqstan oblysynda polıtsııa jappaı is-shara kezinde alǵash ret robot-ıtterdi paıdalandy. Olar óńirdegi qoǵamdyq qaýipsizdikti qamtamasyz etýge arnalǵan tsıfrlyq júıeniń jańa bóligine aınaldy.
— Robot-ıtter belgilengen aýmaqty patrýldep, táýlik boıy beınebaqylaý júrgize alady. Sondaı-aq olar beınejazbalardy taldap, adamdardyń bet-álpetin taný múmkindigine ıe. Jınalǵan aqparat naqty ýaqyt rejıminde Jedel basqarý ortalyǵyna jiberiledi. Bul polıtsııa qyzmetkerlerine jaǵdaıdy jyldam baǵalap, qajet bolǵan jaǵdaıda jedel áreket etýge múmkindik beredi, — deıdi tártip saqshylary.
Festıvalge kelgen azamattarmen tıimdi baılanysý úshin robot-ıtter jaryq sıgnaldarymen jáne daýystyq eskertý jasaýǵa múmkindik beretin daýys zoraıtqyshpen jabdyqtalǵan.
«Nomad Álemi» festıvalindegi alǵashqy tájirıbe zamanaýı tehnologııalardyń polıtsııa jumysyna tıimdi kómek kórsete alatynyn baıqatty. Robot-ıtter dástúrli polıtsııa jasaqtarynyń jumysyn tolyqtyryp, qoǵamdyq qaýipsizdikti qamtamasyz etý men jedel áreket etý múmkindigin arttyrýǵa baǵyttalǵan.
Osyǵan deıin qazaqstandyq stýdentter robototehnıkadaǵy úzdik sheshimi úshin júlde alǵanyn jazǵanbyz.
