Polıtsııanyń 102 jelisine kún saıyn 12–15 myń ótinish túsedi
ASTANA. KAZINFORM — Bıyl 102 arnasyna azamattardan 4 mıllıonnan astam ótinish tústi.
Polıtsııanyń shuǵyl shaqyrýlarǵa arnalǵan 102 baılanys jelisi — halyqtyń ishki ister organdaryna habarlasýy úshin eń kóp paıdalanatyn baılanys arnalarynyń biri. Elimiz boıynsha kún saıyn azamattardan shamamen 12-15 myń ótinish kelip túsip, óńdeledi.
Jyl basynan beri 4 mıllıon 117 myńnan astam ótinish qabyldanǵan. 102 nómirine kelip túsken barlyq qońyraý aqparattyq júıede avtomatty túrde tirkelip, polıtsııanyń keshendi kúshteri arqyly tıisti sharalar qabyldanady. Bul rette birde-bir habarlama nazardan tys qalmaıdy.
«Polıtsııanyń halyqqa qoljetimdiligi» qaǵıdatyn iske asyrý aıasynda turǵyndar úshin tikeleı 102 telefon nómirinen bólek, ótinish qabyldaýdyń qosymsha arnalary qarastyrylǵan. Atap aıtqanda, ótinishterdi qabyldaýdyń omnıkanaldy júıesi, «Police 102» mobıldi qosymshasy, «SOS» dabyl túımesi, sondaı-aq «Zań jáne tártip» servısi jumys isteıdi.
Atalǵan baılanys arnalary azamattarǵa oqıǵalar men quqyq buzý týraly polıtsııaǵa jedel habarlaýǵa múmkindik beredi. Kelip túsken habarlamalar oqıǵanyń sıpaty men bolǵan orny eskerile otyryp, tekserý júrgizý jáne tıisti sharalar qabyldaý úshin ishki ister organdarynyń quzyretti bólimshelerine joldanady.
Aıta ketelik Almatyda SOS batyrmasy bar alǵashqy telemedıtsınalyq modýl iske qosylǵany týraly jazǵan edik.
