Polıtsııaǵa kóligimdi urlady dep shaǵym túsirgen Pavlodar turǵynyna qatysty is qozǵaldy

PAVLODAR. KAZINFORM -Toyota Camry avtokóligin ózge bireý urlap ketti dep polıtsııany aldaǵan pavlodarlyq azamatqa qatysty qylmystyq is qozǵaldy.

Kólik ıesi bastapqyda polıtsııaǵa aryz túsirip, ózin jábirlenýshi retinde kórsetken.

- Er adamnyń aıtýynsha ol byltyr tamyz aıynda beıtanys adamdy Ýsolka ózeniniń arǵy jaǵyna aparady. Álgi adam kólikten shyqqannan keıin kólik ıesin bastan bir uryp qulatyp, ózi kólikke otyryp ketip qalady. Polıtsııa tonaý deregi boıynsha qylmystyq is qozǵap, qylmyskerdi izdeıbastaıdy. Oblys polıtsııasynyń jeke quramy kúdiktini ustaýǵa baǵyttaldy, polıtsııanyń keshendi kúshteri kóterilip, ustaý jospary engizildi, - dep habarlady Pavlodar oblysynyń polıtsııa departamentinen.

Polıtseıler quny 20 mln teńge turatyn Toyota Camry jeńil kóligi nesıege alynǵanyn anyqtaǵan. 2024 jyldyń sáýir aıynda ıesi kólikpen Ózbekstannyń Tashkent qalasyna saparlaǵan. Alaıda bir kúnnen soń ol Qazaqstan aýmaǵyna basqa kólikpen ótken.

Tártip saqshylary kólikti «aıdap ketken» tonaýshyny qansha izdese de tappady. Osy ýaqyt ishinde jábirlenýshi tergeýshige kún saıyn telefon shalyp, isti tezirek jaýyp, sotqa jiberýdi talap etken.

«Tergeý sharalary barysynda kórshi memleketten atalǵan Toyota Camry kóliginiń jańa qojaıyny anyqtaldy. Pavlodarlyq azamat kóliktiń nesıesin tóleı almaı, ony Ózbekstanǵa ótkizip jibergen. Ol osylaı jasasam, kóliktiń avtonesıesi óz-ózinen jabylady dep oılaǵan bolýy kerek»,-dep málimdedi polıtsııa departamentinen.

Polıtsııa jalǵan aqparat berip, aldaǵan azamatqa qatysty qylmystyq is qozǵady.

Eske sala keteıik, Oralda jalǵan nómir taqqan júrgizýshi polıtseılerden qashpaq boldy.