Polıtsııaǵa der kezinde júgingendikten alaıaqtar 200 mln teńgeni jymqyra almaı qaldy

Kıberqylmysqa qarsy turý úshin barlyq óńirde «CyberPol» mamandandyrylǵan jedel tergeý toptary quryldy. Bul týraly QR Іshki ister mınıstriniń orynbasary Igor Lepeha Parlamentte aıtty, dep habarlaıdy Kazinform. 

«Kıberqylmys syn-qaterlerine qarsy turý úshin bıyl shilde aıynda barlyq óńirde «CyberPol» mamandandyrylǵan jedel tergeý toby quryldy. Olar «bir tereze» qaǵıdaty boıynsha jumys isteıdi, banktermen jáne uıaly baılanys operatorlarymen tikeleı ózara is-qımyl jasaıdy.Bul jábirlenýshiler polıtsııaǵa ýaqytyly júgingen kezde aqshany joǵaltý qaterin elden tys shyǵarý satysynda azaıtýǵa múmkindik beredi. Osylaısha, alaıaqtardyń 200 mln teńgege jýyq aqsha alý áreketteri toqtatyldy», - dedi Igor Lepeha Parlamenttik tyńdaýda.

«Cyberpol» jedel is-sharalary arqyly 929 «droper» anyqtaldy.Olardyń banktik kartalaryn «sheteldik alaıaqtar» ózderiniń qylmystyq shemalarynda paıdalanǵan. Keıinnen urlanǵan aqshany alýǵa paıdalanatyn tólem kartochkalaryn nemese sáıkestendirý derekterin úshinshi tulǵalarǵa qasaqana bergeni úshin qylmystyq jaýapkershiliktiń bolmaýyna baılanysty kóptegen «droper» zań salasynda jazasyz qalyp otyr.

«Qurmetti depýtattar, sizderdiń qoldaýlaryńyzben qylmystyq is júrgizý zańnamasyna qajetti túzetýlerdiń jobasy qaralyp jatyr. Qylmystyq kodekstiń 205-babyna banktik jáne ózge de qarjy júıelerine qoljetimdilik bere otyryp, jeke derekterdi qasaqana bergeni úshin jaýapkershilikti kózdeıtin tolyqtyrýlar engiziledi», - dedi Igor Lepeha.

Buǵan deıin mınıstrdiń orynbasary sheteldik alaıaqtarǵa SIM-karta tirkeýge kómektesken qazaqstandyqtarǵa quqyqtyq jaýapkershilik engiziletinin aıtqan edi.

Sondaı-aq I.Lepeha sheteldik alaıaqtardyń qońyraýy buǵattalǵanyn, alaıda qazaqstandyqtardyń ózderi azdaǵan syıaqy úshin alaıaqtarǵa járdem berip otyrǵanyn aıtty.