Polıtsııaǵa azamattardan 778 ótinish tústi: turǵyndardy ne alańdatyp otyr
ASTANA. KAZINFORM – «Biz qasyńdamyz. Bizden surańyz» aqparattyq aktsııasy aıasynda polıtsııa qyzmetkerleri azamattarmen onlaın formatta tikeleı baılanys ornatty, — dep habarlaıdy Polisia.kz.
Aktsııanyń negizgi maqsaty – halyqpen jedel keri baılanysty qamtamasyz etý, kelip túsken suraqtardy qaraý jáne qajet bolǵan jaǵdaıda ótinishterdi quzyreti boıynsha tıisti qyzmetter men uıymdarǵa joldaý boldy. Kórsetilgen kezeńde azamattardan 778 ótinish kelip tústi, onyń ishinde 334 ótinish Threads platformasy arqyly joldanǵan.
-Qaraý nátıjeleri boıynsha 66 ótinish qajetti kómek kórsetý úshin Otbasyn qoldaý ortalyqtaryna joldandy. Ózara is-qımyl barysynda mazmuny men kúrdeliligi ártúrli ótinishter kelip tústi. Olardyń bir bóligi jedel den qoıýdy, al endi bir bóligi qosymsha zerdeleýdi jáne basqa da memlekettik jáne áleýmettik qyzmettermen ózara is-qımyldy talap etti,-delingen habarlamada.
Sondaı-aq onda otbasynda jasalǵan zorlyq-zombylyq faktilerine qatysty ótinishterge erekshe nazar aýdaryldy. Mundaı jaǵdaılarda azamattarǵa tek aqparat berip qana qoımaı, naqty sharalar qabyldaý qajet boldy.
ІІM azamattarmen ózara is-qımyl formattaryn odan ári jetildirip, den qoıý jedeldigin arttyrýdy jalǵastyrady.
-Ózara is-qımyldyń mundaı formatynyń praktıkalyq mańyzy zor. Ol polıtsııanyń ǵana emes, basqa da qyzmetterdiń aralasýyn talap etetin máselelerdi erterek anyqtaýǵa jáne birlesken kúsh-jigermen tıimdi kómek kórsetýge múmkindik beredi. «Biz qasyńdamyz.. Bizden surańyz» — bul aktsııanyń ataýy ǵana emes. Bul — ІІM-niń halyqpen jumys isteýdegi basty qaǵıdasy,-dep málimdedi Іshki ister mınıstrliginiń baspasóz qyzmeti.
Osyǵan deıin Shymkentte polıtsııaǵa turmystyq zorlyq-zombylyq boıynsha 4 myńnan astam shaǵym túskeni týraly jazdyq.
