Polıtsııa joldardaǵy ortasha jyldamdyqqa baqylaýdy kúsheıtpek

— Joldaǵy qaýipsizdik máselesi mınıstrliktiń erekshe baqylaýynda. Bul másele bıylǵy jyly quqyq buzýdyń aldyn alý jónindegi vedomstvoaralyq komıssııanyń otyrysynda qaraldy. Keshendi uıymdastyrýshylyq jáne zańnamalyq sharalar qabyldandy. Nátıjesinde bıyl jol apaty boıynsha barlyq kórsetkishter tómendep jatyr: jol-kólik oqıǵalary 5 paıyzǵa, qaza tapqandar 15 paıyzǵa, jaraqat alǵandar 6 paıyzǵa azaıdy. Biraq bul nátıjemen shektelip, ózimizdi jubatýǵa bolmaıdy. Árbir sannyń artynda adam ómiri men densaýlyǵy tur. Sondyqtan naqty jumystardy jalǵastyryp jatyrmyz, — dedi mınıstr.

Onyń atap ótýinshe, kólik tártibine baqylaý kúsheıtildi. Tehnıkalyq sheshimder belsendi qoldanylyp jatyr. Osy saladaǵy barlyq tsıfrlyq servıster «Tor» platformasyna biriktirildi. Onyń nátıjesi mynadaı:

1. jasandy ıntellektti qoldaný arqyly kólikterdi baqylaý júrgizilip jatyr. 8 saǵattan artyq rólde otyrǵan adamdar, sondaı-aq urlanǵan avtokólikter anyqtalý ústinde;

2. «Qorǵaý» júıesi arqyly izdeýde júrgen, jalǵan nómir taǵyp alǵan kólikterdi jáne óreskel buzýshylar anyqtalady;

3. jol erejesiniń buzýshylyqtaryn avtomatty túrde anyqtaıtyn júıeler damytyp jatyr. Olardyń sany 28 myńǵa 32 myńǵa jetkizildi;

4. respýblıkalyq trassalarda ortasha jyldamdyqty baqylaý júıesi qoldanylady. Dál osy júıe ornatylǵan ýchaskelerde jol-kólik oqıǵalary sany 10 paıyzǵa, qaza tapqandar 33 paıyzǵa, jaraqat alǵandar 12 paıyzǵa azaıdy

— Búginde bul júıe uzyndyǵy 2 800 shaqyrymdy quraıtyn 12 ýchaskede bar. Jyl sońyna deıin Kólik mınıstrligimen birge taǵy 16 ýchaskede ornatamyz. Osylaısha, ortasha jyldamdyqty ólsheıtin quraldar barlyǵy 5 600 shaqyrym bolatyn 28 ýchaskede jyl aıaǵyna deıin ornatylatyn bolady. Kelesi jyldan bastap bul jumysty ári jalǵastyramyz, — dedi Erjan Sádenov.

Aıta keteıik, otyrysta jol qozǵalysy qaýipsizdigin qamtamasyz etý máselesi qaralyp, jylý berý maýsymyna daıyndyq barysy pysyqtalyp jatyr.