Polıtsııa Jetisýda balany uryp-soqqan áıeldi ustady

ASTANA. KAZINFORM – Messendjerlerde «júregi álsizder qaramasyn» dep jazylǵan jas balanyń uryp-soǵylǵany kórsetilgen beınejazba taralyp jatyr. Oqıǵa Panfılov aýdanynyń Jarkent qalasynda bolǵan.  

Jetisý oblystyq polıtsııa departamenti dereý tekserý bastalǵanyn habarlady.

- Panfılov aýdandyq polıtsııa qyzmetkerleri Jarkent qalasyndaǵy WhatsApp toptarynda taralǵan beınejazba faktisi boıynsha tekserý júrgizdi. 28 jastaǵy áıeldiń kishkentaı balasyna dene jaraqattaryn salǵany anyqtaldy, - dep habarlady polıtsııa.

Atalǵan fakti boıynsha qylmystyq is qozǵaldy. Kúdikti polıtsııa bólimshesine jetkizildi, onymen tergeý amaldary ótkizilip jatyr, sodan keıin ol ýaqytsha ustaý abaqtysyna qamaldy.

- Qaýipsizdikti qamtamasyz etý maqsatynda eki bala Otbasyn qoldaý ortalyǵyna ýaqytsha ornalastyryldy. Ata-ana quqyǵynan aıyrý máselesin qarastyrý úshin qorǵanshylyq jáne qamqorshylyq organyna usynys jiberiledi, - dep qosty vedomstvo.

Atap ótilgendeı, tergeý barysyn Jetisý oblystyq polıtsııa departamentiniń basshylyǵy jeke baqylaýyna alǵan. Tergeý qorytyndylary boıynsha kináliler Qazaqstan Respýblıkasynyń zańnamasyna sáıkes jaýapqa tartylady.

- Zardap shekken balaǵa qajetti medıtsınalyq kómek kórsetildi. Balalardyń jaǵdaıy turaqty, olarǵa psıhologııalyq qoldaý kórsetilip jatyr. Balalardyń quqyqtary jónindegi aımaqtyq ókil jaıdaıdy baqylaýyna alǵan, - dep atap ótti QR Bilim mınıstrliginiń Balalar quqyqtaryn qorǵaý komıteti.

Buǵan deıin Almatyda balany aıaýsyz tepken er adam qamaýǵa alynǵanyn jazǵan edik.