Polıtsııa terek mamyǵyn órtegender jazalatynyn eskertti
ASTANA. KAZINFORM - Búginde kámeletke tolmaǵandar men eresekterdiń terek mamyǵyn órteý faktileri tirkelip jatyr. Kópshilik muny «ermek» dep qabyldaǵanymen, mundaı áreketter qoǵamdyq qaýipsizdikke eleýli qater tóndirip, qurǵaq shóptiń, qoqystyń, avtokólikterdiń, balalar alańdarynyń jáne turǵyn úılerdiń órtenýine sebep bolýy múmkin, dep habarlaıdy Polisia.kz.
Polıtsııa terek mamyǵyn qasaqana órteý órt qaýipsizdigi talaptary men qoǵamdyq tártipti buzý bolyp sanalatynyn eskertedi. Jaǵdaıdyń mán-jaıy men saldaryna qaraı kináli tulǵalar kelesi baptar boıynsha jaýapqa tartylýy múmkin:
— Qazaqstan Respýblıkasynyń Ákimshilik quqyqbuzýshylyq týraly kodeksiniń 410-baby boıynsha — órt qaýipsizdigi talaptaryn buzǵany nemese oryndamaǵany úshin;
— QR ÁQBtK-niń 434-baby boıynsha — qoǵamdyq tártipti buzatyn usaq buzaqylyq áreketteri úshin;
— kámeletke tolmaǵandardyń zańdy ókilderi QR ÁQBtK-niń 127-baby boıynsha balalardy tárbıeleý jáne olardyń qaýipsizdigin qamtamasyz etý jónindegi mindetterin tıisinshe oryndamaǵany úshin jaýapkershilikke tartylýy múmkin.
-Eger terek mamyǵyn órteý saldarynan materıaldyq shyǵyn keltirilse nemese iri órt oryn alsa, qylmystyq jaýapkershilik te kózdelgen. Polıtsııa ata-analardy balalarmen profılaktıkalyq áńgime júrgizýge, al azamattardy terek mamyǵyn órteý nemese órt faktileri týraly dereý «102» arnasyna habarlaýǵa shaqyrady. Qaýipsizdik — ár adamnyń jaýapkershiliginen bastalady,-delingen habarlamada.
Osyǵan deıin úı janýarlaryn azaptaǵandar qylmystyq jaýapkershilikke tartylatyny týraly jazdyq.
