Polıtsııa terek mamyǵyn órtegender jaýapqa tartylatynyn eskertti
ASTANA. KAZINFORM – Qazaqstan polıtsııasy terek mamyǵyn órtegeni úshin ákimshilik jáne qylmystyq jaýapkershilik qarastyrylǵanyn eskertti.
Quqyq qorǵaý organdarynyń málimetinshe, qazirgi ýaqytta kámeletke tolmaǵandar men eresekterdiń terek mamyǵyn órteý faktileri tirkelip jatyr.
Polıtsııa mundaı áreketterdiń kóp jaǵdaıda «ermek» retinde qabyldanatynyn, alaıda onyń qoǵamdyq qaýipsizdikke eleýli qater tóndiretinin atap ótti.
– Terek mamyǵyn órteý qurǵaq shóptiń, qoqystyń, avtokólikterdiń, balalar alańdarynyń jáne turǵyn úılerdiń órtenýine sebep bolýy múmkin, – dep eskertti polıtsııa ókilderi.
Vedomstvonyń habarlaýynsha, terek mamyǵyn qasaqana órteý órt qaýipsizdigi talaptary men qoǵamdyq tártipti buzý retinde baǵalanady.
Jaǵdaıdyń saldaryna baılanysty kináli tulǵalar birneshe bap boıynsha jaýapkershilikke tartylýy múmkin.
Atap aıtqanda, QR Ákimshilik quqyq buzýshylyq týraly kodeksiniń 410-baby boıynsha órt qaýipsizdigi talaptaryn buzǵany úshin, 434-baby boıynsha usaq buzaqylyq áreketteri úshin jaýapkershilik qarastyrylǵan.
Sondaı-aq kámeletke tolmaǵandardyń zańdy ókilderi QR ÁQBtK-niń 127-baby boıynsha balalardy tárbıeleý jáne olardyń qaýipsizdigin qamtamasyz etý mindetterin tıisinshe oryndamaǵany úshin jaýapqa tartylýy múmkin.
– Eger terek mamyǵyn órteý saldarynan materıaldyq shyǵyn keltirilse nemese iri órt oryn alsa, qylmystyq jaýapkershilik te kózdelgen, – dep málimdedi polıtsııa.
Quqyq qorǵaý organdary ata-analardy balalarmen profılaktıkalyq áńgime júrgizýge shaqyrdy.
Sonymen qatar azamattarǵa terek mamyǵyn órteý nemese órt faktileri baıqalǵan jaǵdaıda «102» arnasyna dereý habarlaý qajettigi eskertildi.
– Qaýipsizdik – ár adamnyń jaýapkershiliginen bastalady, – dep atap ótti polıtsııa qyzmetkerleri.
Aıta keteıik,
