Polıtsııa tarazdyqtarǵa mas kúıde kólik aıdaýdyń qaýpin vırtýaldy álemde kórsetti

TARAZ. KAZINFORM — Zamanaýı tehnologııalar mas kúıde kólik júrgizýdiń aldyn alý jumystaryna qatystyryldy. Bul týraly Jambyl oblystyq polıtsııa departamentiniń baspasóz qyzmeti habarlady.

Taraz qalasynda polıtsııa qyzmetkerleri túsindirý jumystarynyń jańa formatyn engizip, elimizde alǵash ret joldaǵy qaýip-qaterlerdi VR-tehnologııalar arqyly kórsetýdi uıymdastyrdy. Joba júrgizýshilerdiń quqyqtyq mádenıetin arttyrýǵa jáne jolda qaýipsiz minez-qulyq daǵdylaryn qalyptastyrýǵa baǵyttalǵan.

Arnaıy kózildiriktiń kómegimen qatysýshylar ınteraktıvti rejımde jol qozǵalysy erejelerimen, tas joldaǵy modeldengen jaǵdaılarmen jáne alkogoldik masań kúıdegi júrgizýshiniń sezimderimen tanysty. Vırtýaldy sımýlıatsııa jol jaǵdaıynyń «ishine enip ketkendeı» áser qaldyrdy: beıne bulyńǵyrlanyp, qımyl-qozǵalys úılesimi buzylyp, reaktsııa baıaýlap, basqa kólikterge deıingi araqashyqtyqty qabyldaý burmalandy.

Qatysýshylardyń aıtýynsha, tipti qaýipsiz tsıfrlyq stsenarııdiń ózi alańdaýshylyq pen abyrjýdy týdyrǵan. Bul rólde otyryp jasalǵan kez kelgen qate árekettiń qanshalyqty qaýipti ekenin túsinýge múmkindik bergen. Ásirese jol-kólik oqıǵasynyń vırtýaldy modeli erekshe emotsııalyq áser qaldyryp, erejeni buzýdyń saldaryn aıqyn kórsetken.

Іs-sharaǵa jas jol ınspektorlarynyń jasaqtary da qosyldy. Olar qala turǵyndaryn Jol qozǵalysy erejelerin qatań saqtaýǵa jáne jolda muqııat bolýǵa shaqyrdy.

Eske sala ketsek, Mańǵystaý polıtsııasy bastyǵy men dáriger ushaqta shetel azamatyn qutqarǵanyn jazdyq.