Polıtsııa Talǵardaǵy oqıǵa ornyna neshe mınýtta jetti – vedomstvo jaýaby

ASTANA. KAZINFORM – Talǵar qalasyndaǵy tóbeles kezinde qylmys jasalǵannan keıin ǵana polıtsııaǵa habar kelip túsken. Bul týraly QR Іshki ister mınıstriniń birinshi orynbasary Baýyrjan Álenov málim etti.

Almaty oblysynyń óńirlik kommýnıkatsııalar qyzmetindegi baspasóz máslıhatynda tilshiler Talǵar qalasyndaǵy janjal 20 mınýtqa sozylǵanyn jáne osy ýaqyt aralyǵynda polıtseıler qaıda bolǵany jaıynda suraq qoıdy.

«Tóbeles kezinde polıtsııany eshkim shaqyrmady ma? Nelikten quqyq qorǵaý organdarynyń qyzmetkerleri sol ýaqytta bolmaǵan?», - dep surady tilshi.

Óz kezeginde B. Álenov sol kúni qylmys jasalǵannan keıin ǵana polıtsııaǵa habar kelip túskenin aıtty.

«Polıtsııaǵa telefon shalǵannan keıin, qyzmetkerler birden oqıǵa ornyna attandy, ıaǵnı 8 mınýttan keıin jetti. Atap aıtqanda, kóshedegi janjalǵa qatysty tolyq tekserý jasap, onyń qorytyndysy boıynsha tıisti baǵasyn beremiz. Onyń ishinde polıtsııanyń jumysyna da toqtalamyz», - dedi Іshki ister mınıstriniń birinshi orynbasary.

Eske salaıyq,4 qazanda Talǵar qalasyndaǵy tóbelesten bir adam qaıtys bolǵanyn jazǵanbyz.

Ashýly talǵarlyqtar jasóspirim ólimine baılanysty narazylyqqa shyqty.

Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady.

Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy.

Sondaı-aq, quqyq qorǵaýshy Aıtbek Amangeldi qaza tapqan jasóspirimniń otbasyna advokattar taýyp berdi.

Almaty oblystyq polıtsııa departamenti bastyǵynyń mindetin atqarýshy Serik Shalqarov beınebaqylaý kameralarynan alynǵan jazbalar zerttelip jatqanyn jetkizdi.

12 qazan kúni túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

Sondaı-aq, Bas prokýratýra qylmysty ashý úshin vedomstvoaralyq jedel-tergeý toby qurylǵanyn málimdedi.

Іshki ister mınıstriniń birinshi orynbasary Baýyrjan Alenov marqum Sherzat Bolattyń úıin órteý oqıǵasyn tergeý tobymen Talǵarǵa bardy.

Keıin Іshki ister mınıstriniń birinshi orynbasary Baýyrjan Alenov órt qylmysy boıynsha aıǵaqtar alynyp, tıisti saraptamalar júrgizilip jatqanyn habarlady.

Qoǵamdyq tártipti qadaǵalaý úshin Ulttyq ulan áskeri jumyldyryldy.