Polıtsııa sıntetıkalyq esirtkiniń nesimen qaýipti ekenin aıtty

ASTANA. KAZINFORM – Astana qalasy polıtsııa departamentiniń esirtki qylmysyna qarsy is-qımyl basqarmasynyń asa mańyzdy ister jónindegi aǵa jedel ýákili Álııa Qıbatqyzy astanalyq jasóspirimderdi sıntetıkalyq esirtkiden aýlaq júrýge shaqyrdy.

- Ásirese sıntetıkalyq esirtki táýeldilikti erte shaqyrady. Bir ret tutynǵannan «tutqyn» bolyp jatqandar bar. Sondyqtan balalarǵa aldanyp qalmańyzdar deımiz. Jyldyń basynan beri kámeletke tolmaǵan 4 jasóspirim esirtki qylmysyna baryp otyr. Biz úshin bul jaı ǵana statıstıka emes. 4 jasóspirim degenniń ózi ár qylmystyń artynda adam taǵdyry tur degen sóz. Sondyqtan óz ómirlerińizge, bolashaqtaryńyzǵa jaýaptyraq qarańyzdar. Aldanyp qalmańyzdar, - dedi ol.

Aıta ketý kerek, búgin elordada esirtkige qarsy aılyq naýqan bastaldy.

Buǵan deıin Atyraýda 37 jastaǵy turǵyn 1 keliden astam sıntetıkalyq esirtkimen ustalǵan bolatyn.