Polıtsııa Shymkentte qaza tapqan stýdent qyzdyń otbasy jarııalaǵan derekterge jaýap berdi
ShYMKENT. KAZINFORM – 21 jastaǵy Nuraı Serikbaıdyń pyshaq jaraqattarynan qaza tabýyna qatysty, marqumnyń týǵan-týystary qaıǵyly oqıǵanyń aldyn alýǵa múmkindik bolǵanyn málimdedi. Olardyń aıtýynsha, marqum qýdalaý men qorqytý derekteri boıynsha birneshe ret kómek surap quqyq qorǵaý organdaryna júgingen, alaıda joldanǵan ótinishter tıisti deńgeıde qaralmaǵan.
Qaıǵyly oqıǵadan keıin Nuraıdyń jaqyndary áleýmettik jelilerde qyzdyń birneshe aı boıy únemi qorqynyshta ómir súrgenin baıandaǵan jazbalar jarııalady.
Olardyń aıtýynsha, kisi óltirýge kúdikti Aımahan Sherhan – Nuraıdyń oǵan turmysqa shyǵýdan bas tartqanynan keıin qýdalaýdy bastaǵan.
Týystary Nuraıdyń mektepti úzdik bitirip, Almatyda oqyǵanyn, qysqy demalysqa Shymkentke kelgenin aıtady. Kúdiktimen ol toıda tanysqan. Sol kúnnen bastap er adam boıjetkenniń qyr sońyna túsip alǵan. Qyzdyń bas tartýynan keıin jigit ony jıi mazalaı bastaǵan, tipti Almatydan Shymkentke kúshtep alyp qashqan. Týystary polıtsııamen birge kúdiktiniń úıine baryp, qyzdy alyp ketken.
Jaqyndary onyń qaýipsizdigine alańdap, aryz jazǵan. Keıinirek Nuraı tatýlasýǵa kelisip, er adam qýdalaýdy toqtatýǵa ýáde bergen. Alaıda qorqytý men mazalaý odan ári jalǵasqan.
Týystarynyń sózinshe, er adam Nuraıǵa jáne onyń qurbylaryna áleýmettik jeliler arqyly hat jazǵan, sabaq kestesin anyqtaǵan, oqý ornyna barǵan, telefon arqyly qorqytqan jáne úıiniń mańynda ańdyǵan. Boıjetken hat almasýlardy tirkep, skrınshottar jasap, polıtsııaǵa júgingen.
– Ol Nuraıǵa: «Sen meni túrmege otyrǵyza almaısyń», dep aıtqan. Nuraı únemi qorqynyshta ómir súrdi. Aǵasy ony sabaqqa aparyp, qaıta alyp ketýge májbúr boldy. Biz polıtsııaǵa da, prokýratýraǵa da júgindik, biraq is júzinde eshteńe jasalmady. Eger sol kezde tıisti sharalar qabyldanyp, mamandar men psıhologtar tartylǵanda, bul qylmys bolmas edi, – deıdi týystary.
Marqumnyń týystary barlyq qaýip belgilerine qaramastan, jaǵdaı baqylaýǵa alynbaǵanyn aıtady. Ókinishtisi sol, 11 qańtarda boıjetken qaza tapty.
Polıtsııa ne dedi?
Kazinform agenttiginiń joldaǵan suraýyna jaýap bergen polıtsııa departamenti marqumnyń týystary aıtqan barlyq derekter sotqa deıingi tergeý aıasynda tekserilip jatqanyn habarlady.
– Shymkent qalasynda 21 jastaǵy qyzdy óltirý faktisi boıynsha barlyq mán-jaıdy anyqtaýǵa baǵyttalǵan jedel-tergeý is-sharalary jalǵasyp jatyr. Kúdiktige qatysty sot sanktsııasymen qamaýǵa alý túrindegi bultartpaý sharasy tańdaldy. Qaza tapqan qyzdyń týystary keltirgen barlyq ýájder men derekter tekserilip jatyr. Sotqa deıingi tergeý nátıjeleri boıynsha quqyqtyq baǵa beriledi. Qylmystyq istiń tergelý barysy Shymkent qalasy polıtsııa departamenti bastyǵynyń jeke baqylaýynda, – dedi qalalyq PD baspasóz hatshysy Baǵlan Isataeva.
Sonymen qatar buǵan deıin berilgen ótinishterdiń qaralmaýy múmkin degen jaıtqa baılanysty polıtsııa barlyq keltirilgen ýájderdiń tekserilip jatqanyn málimdedi.
Budan buryn atalǵan oqıǵa boıynsha 28 jastaǵy kúdikti er adam ustalyp, ýaqytsha ustaý ızolıatoryna qamalǵanyn jazǵan edik.
