Polıtsııa pýnktindegi qaıǵyly oqıǵa: Qaraǵandyda rezonansty is boıynsha sot bastaldy
QARAǴANDY. KAZINFORM — Qaraǵandyda polıtsııanyń tirek pýnktinde 23 jastaǵy qyzdyń qaza bolýyna qatysty qylmystyq is boıynsha sot otyrysy bastaldy. Іs materıaldaryna sáıkes belgisiz zattan qatty ýlanǵan ýchaskelik polıtsııa ınspektory aıyptalýshy retinde qarastyrylyp jatyr.
Sot otyrysynyń alǵashqy kúninde prokýror aıyptaý aktisin jarııalap, ótken jylǵy qyrkúıektiń 29-nan 30-na qaraǵan túni bolǵan oqıǵanyń mán-jaıyn baıandamaqshy boldy. Alaıda aıyptaý tarapyna ashyq sot otyrysynda mundaı múmkindik berilmedi. Qorǵaý tarapynyń ótinishin qanaǵattandyrǵan sot tóresi protsesti jabyq rejımde ótkizý týraly sheshim qabyldady.
Osyǵan baılanysty ázirge aıyptaý mazmuny men polıtsııanyń tirek pýnktinde bolǵan oqıǵanyń egjeı-tegjeıi jarııa etilmeıdi.
Іs boıynsha basty máselelerdiń biri — jas áıeldiń ólimine jáne polıtsııa qyzmetkeriniń aýyr halge túsýine sebep bolǵan zattyń shyǵý tegin anyqtaý. Oqıǵanyń naqty mán-jaıy men sottalýshynyń kinási men jaýapkershilik deńgeıine qatysty túpkilikti sheshimdi sot qabyldaıdy.
Eske salaıyq, ótken jyldyń 29 qyrkúıeginen 30 qyrkúıegine qaraǵan túni Qaraǵandydaǵy polıtsııanyń tirek pýnktteriniń birinen jas áıeldiń máıiti tabylǵan bolatyn.
Sol jerden es-tússiz jatqan polıtsııa qyzmetkeri de tabylyp, ol aýrýhanaǵa jetkizilgen.
Oqıǵaǵa baılanysty qylmystyq is qozǵaldy. Barlyq mán-jaıdy anyqtaý maqsatynda arnaıy jedel-tergeý toby qurylyp, qyzmettik tekserý júrgizildi. Qaıǵyly jaǵdaıdan keıin polıtsııa basshylary qyzmetterinen bosatyldy.
Keıin Іshki ister mınıstriniń orynbasary Sanjar Ádilov oqıǵa ornynda bolǵan polıtseıge qatysty qorǵanýǵa quqyǵy bar kýáger mártebesi berilgenin málimdegen edi.
