Polıtsııa prodıýserden bala kezinde zorlyq kórgeni týraly málimdemeni tekserip jatyr
ALMATY. KAZINFORM – Áleýmettik jelilerde zorlyq týraly málimdeme jasalǵan beınejazba tarady.
Beınejazba avtory Nurǵalı Nuǵmannyń aıtýynsha, ol bala kezinde prodıýserden zorlyq kórgen.
Almaty qalasynyń polıtsııa departamenti beınejazba boıynsha materıal belgilengen tártippen tirkelgenin habarlady. Qazirgi ýaqytta protsessýaldyq tekseris bastalǵan.
- Jazbada kórsetilgen barlyq mán-jaılardy, sondaı-aq oqıǵaǵa qatysy bolýy múmkin tulǵalar men kýágerlerdi anyqtaýǵa baǵyttalǵan keshendi sharalar júrgizilip jatyr. Balalarǵa qatysty yqtımal zorlyq-zombylyq derekteri boıynsha mundaı ótinishter mindetti túrde quqyqtyq baǵalaýǵa jatady jáne erekshe baqylaýda bolady, - dep habarlady departamentten.
Polıtsııa atalǵan derek rastalǵan jaǵdaıda Qazaqstan Respýblıkasynyń zańnamasyna sáıkes tıisti sharalar qabyldanatynyn atap ótti.
Eske salaıyq, buǵan deıin De Lacure tóńiregindegi daýǵa baılanysty Almaty polıtsııasy tergeý nátıjesin jarııalady.
