Polıtsııa men prokýratýra Maıqaıyńdaǵy apat boıynsha qozǵalǵan qylmystyq isti tergep jatyr
PAVLODAR. KAZINFORM – Qylmystyq isti tergeý sheńberinde kásiporynnyń 40-tan astam qyzmetkerinen, sondaı-aq JShS basshylyǵynan jaýap alyndy. Іs boıynsha protsessýaldy prokýrorlar taǵaıyndaldy.
Pavlodar oblysy polıtsııa departamentiniń tergeý basqarmasy osy jyldyń 4 qańtarynda Baıanaýyl aýdany Maıqaıyń kentindegi «Maıqaıyńaltyn» AQ aýmaǵynda bolǵan oqıǵa faktisi boıynsha Qylmystyq kodekstiń 277-baby 3-bóligi (taý-ken nemese qurylys jumystaryn júrgizý kezinde qaýipsizdik erejelerin buzý) boıynsha qylmystyq isti tergeý ústinde.
«Joldyń opyrylýy saldarynan taý-ken karerine apattyq-qutqarý qyzmetiniń 4 qyzmetkeri bar avtobýs qulaǵany anyqtaldy, 2 adamnyń denesi sol kúni shyǵaryldy. Taý-ken jumystaryn júrgizý qaýipsizdigi erejelerin buzýshylyqtardy tergeý jónindegi komıssııa quryldy. Іs boıynsha protsessýaldy prokýrorlar taǵaıyndaldy. Qazba ornynan avtobýstyń birneshe fragmentteri men qutqarýshylardyń jeke jabdyqtary jer betine kóterildi. Qazirgi ýaqytta oqıǵa ornyna jol salý úshin topyraq shyǵarylyp, geoskanerleý júrgizilýde, shaǵyn kólemdi ekskavatorlar túsirildi, eki qutqarýshyny izdeý jalǵasyp jatyr. Taý jynystarynyń turaqsyzdyǵyna jáne shuńqyr astynda qýys jerler paıda bolyp, topyraqtyń basýyna baılanysty jumystardy júrgizý qıyndaýda. Qylmystyq isti tergeý sheńberinde kásiporynnyń 40-tan astam qyzmetkerinen, sondaı-aq JShS basshylyǵynan jaýap alyndy, qajetti qujattar, beınebaqylaý kameralarynan jazbalar alyndy» dep habarlady Pavlodar oblysynyń prokýratýrasy.
Qylmystyq is boıynsha joldyń opyrylyp qulaý sebepterin anyqtaý úshin elimizdiń túrli aımaqtarynan taý-ken-qurylys jumystary salasynyń mamandaryn tarta otyryp, birqatar saraptama taǵaıyndalǵan.
Tergeý Bas prokýratýranyń baqylaýynda.
