Polıtsııa Lývrdy tonaý isine qatysty barlyq kúdiktini qamaýǵa aldy

ASTANA.KAZINFORM — Frantsýz polıtsııasy Lývrdy tonaý isindegi kúdiktilerdi tutqyndaý operatsııasyn aıaqtady, dep habarlaıdy Kazinform agenttigi.

Bild basylymynyń habarlaýynsha, 34 pen 39 jas aralyǵyndaǵy tórt er adam tutqyndaldy. Sońǵy kúdikti bir apta buryn Laval qalasynda ustalǵan. Ol qurylys alańynda tutqyndalyp, qazir jeke kamerada otyr. Onyń advokattary «onyń Lývrda bolǵany týraly eshqandaı belgi joq» ekenin málimdeıdi jáne olar tutqyndaýǵa qarsy apellıatsııalyq shaǵym túsirýdi josparlap otyr.

Basylymnyń málimetinshe, Sena-Sen-Denı departamentinen shyqqan 39 jastaǵy er adam buryn sýtenerlik, júrgizýshi kýáliginsiz kólik júrgizý, urlanǵan zattardy satý jáne basqa da quqyq buzýshylyqtar úshin alty ret sottalǵan. Osyndaı qylmystardyń biri úshin 2010 jyly ol eki aıǵa shartty túrde bas bostandyǵynan aıyryldy.

Tergeýshilerdiń málimetinshe, toptyń ekeýi Apollon galereıasyna kirgen, al qalǵan ekeýi, sonyń ishinde qazir qamaýda otyrǵan er adam, syrtta kútip turǵan. Tórteýi de 88 mıllıon eýroǵa baǵalanǵan koroldik zergerlik buıymdarmen qashyp ketken. Sońǵy tutqyndalǵan adam zergerlik buıymdardy aq fýrgonmen áketken.

Urlyqqa kómektesti jáne yqpal etti dep aıyptalǵan istegi taǵy bir kúdikti osy toptaǵy bireýdiń seriktesi, ol qazir bostandyqta. Tutqyndalǵandardyń barlyǵy buǵan deıin usaq qylmystar jasaǵan, al tergeýshiler urlyqtyń artynda tapsyrys berýshi jáne uıymdastyrýshy bar dep sanaıdy. Urlanǵan patshalyq zergerlik buıymdardyń qaıda ekeni áli kúnge belgisiz.

Esterińizge sala keteıik, buǵan deıin Parıjdegi Lývrge ury túsip, Napaleon áshekeıleri qoldy bolǵanyn habarlaǵan edik.

Urlanǵan zattardyń arasynda frantsýz patshaıymdary men ımperatrıtsalaryna tıesili zergerlik buıymdar bar. Zergerlik buıymdardyń jalpy quny 88 mıllıon eýroǵa baǵalandy.

Keıinirek Lývr mýzeıiniń qaýipsizdik júıesine qatysty taǵy bir daý shyqty.