Polıtsııa quramynda esirtki bar alty myń tabletka men ampýla tárkiledi

13 qarashadan bastap ishki ister organdary respýblıka boıynsha “Dármek” keń aýqymdy jedel-aldyn alý sharasyn ótkizip jatyr, dep habarlaıdy Kazinform Polisia.kz-ke silteme jasap. 

Onyń maqsaty – dárilik zattardyń zańsyz aınalymǵa ketpeýin, kontrabandalyq jolmen taralmaýyn qadaǵalaý, bolǵan jaǵdaıda – jolyn kesý.

Polıtseıler esirtki, psıhotroptyq zattar men prekýrsorlardy paıdalanatyn kásiporyndar men uıymdardy, dálirek aıtqanda, medıtsınalyq mekemelerdi, dárihanalardy, qoımalardy, ónerkásiptik kásiporyndardy jáne basqa da obektilerdi tekserýdi bastady. Reıdtiń alǵashqy kúninde atalǵan salada 11 qylmys pen 63 ákimshilik quqyq buzýshylyq anyqtaldy.

Ákimshilik jaýapkershilikke 63 adam tartyldy, onyń ishinde 11 medıtsına qyzmetkeri bar.

Durys saqtalmaǵan, quramynda esirtki jáne psıhotroptyq zattar bar alty myńǵa jýyq tabletka men medıtsınalyq preparattardyń ampýlalary tárkilendi. 13,4 tonnadan astam prekýrsorlardyń aınalymy lıtsenzııalyq normalardyń jáne olardy saqtaý qoımalarynyń tehnıkalyq jaǵdaılary talaptarynyń buzylýyna baılanysty shekteldi. Mysaly, Atyraý oblysynda kompanııalardyń birine júrgizilgen tekserý barysynda tehnıkalyq talaptardyń buzylýy, ıaǵnı kúzet-dabyl júıesiniń jáne terezelerdegi temir torlardyń joqtyǵy anyqtaldy.

Onda bolǵan 7,3 tonna prekýrsor plombalanyp, arnaıy orynǵa saqtaýǵa tapsyryldy.