Polıtsııa qyzmetkerine jat qylyq: Vıtse-mınıstr jumystan shyǵarylǵan týrıstik polıtseıler týraly
ASTANA. KAZINFORM — Іshki ister mınıstriniń orynbasary Igor Lepeha Astanada týrıstik polıtsııada qyzmet etken eki qyzmetkerdiń jumystan bosatylýy jóninde túsinikteme berdi.
Úkimette ótken brıfıngte jýrnalıster mınıstrliktiń ne sebepti tártiptik jaza retinde jumystan shyǵarýdy tańdaǵanyn jáne qyzmetkerlerdiń áreketi polıtsııaǵa qandaı zııan keltirgenin surady.
Igor Lepeha bul sheshim qoǵamda qyzý talqylanyp, qazaqstandyqtardyń pikiri ekige bólingenin atap ótti.
— Bireýler qoldady, endi bireýler úzildi-kesildi qarsy boldy. Bul máseleni tártiptik komıssııa qarady. Komıssııa olardyń áreketinen kem degende qyzmettik ádep talaptaryn jáne polıtsııa qyzmetkerleriniń minez-qulqyna qoıylatyn talaptardy buzý belgilerin anyqtady, — dep jaýap berdi ol.
Vıtse-mınıstrdiń aıtýynsha, QR ІІM qyzmettik mindetin atqaryp júrgen jáne polıtsııa formasyn kıgen qyzmetkerlerdiń mundaı áreketke barýyn orynsyz dep sanaıdy.
— Bálkim, biz konservatıvti kózqarastaǵy adamdar shyǵarmyz. Biraq polıtsııa qyzmetkeri ózin bulaı ustamaýy kerek dep esepteımiz. Tártiptik komıssııa olardy jumystan shyǵarý qajet dep uıǵardy, — dedi Igor Lepeha.
Jýrnalıster mundaı sheshim polıtsııa men qoǵam arasyndaǵy baılanysty ashyq ári azamattarǵa baǵdarlanǵan etý jónindegi ustanymǵa qaıshy emes pe dep te surady.
Igor Lepehanyń pikirinshe, «Halyqqa jaqyn polıtsııa» qaǵıdaty eń aldymen qyzmetkerlerdiń azamattar qajettiligine kózqarasynan jáne óz mindetin qanshalyqty sapaly atqaratynynan kórinýi kerek.
— Qyzmetker, eń aldymen, azamattyń qajettiligin kórip, oǵan jaýap bere bilýi kerek. Mysaly, qylmys jasalsa, ony barynsha tez ashý qajet nemese qyzmet atqaryp júrgen kezde qylmystyń aldyn alýy tıis. Negizgi mindetimiz osy dep oılaımyn. Al biz onda bılep, án aıtyp júrsek… Onyń reti bola qoımas. Árıne, jumystan tys ýaqytta, basqa jerde bolsa, óz erki, — dedi mınıstrdiń orynbasary.
Ótken aptada elordadaǵy týrıstik polıtsııa qyzmetkerleri qyzmettik mindetterin atqarý barysynda ádep normalaryn buzǵany úshin jumystan bosatylǵan edi.
Aıta keteıik, jol apaty kóp bolatyn jerlerge medıtsınalyq-qutqarý beketteri jaqyndatylady.
Kólik júrgizý quqyǵynan aıyrylǵandar taksıde qyzmet ete almaıdy.
Sondaı-aq jańadan kólik júrgize bastaǵan azamattardy daıarlaý sapasyna talap kúsheıtiledi.
