Polıtsııa qyzmetkerin kóligimen súırep ketken júrgizýshi 7 jylǵa sottaldy

ShYMKENT. KAZINFORM — Shymkent qalasynyń qylmystyq ister jónindegi aýdanaralyq sotynda QK-niń 380-baby 5-bóligi boıynsha aıyptalǵan sottalýshyǵa qatysty qylmystyq is qaraldy.

Shymkent qalasynyń Áıteke bı kóshesinde kóligimen kele jatqan júrgizýshini polıtsııa ınspektory toqtatqan. Sodan baǵdarshamnyń tyıym salatyn belgisine ótkeni sebepti hattama toltyratynyn eskertken. Inspektordyń qujattardy kórsetý týraly zańdy talabyn oryndaýdan bas tartqan kúdikti oqıǵa ornynan boı tasalaýǵa árekettengen.

Qaýipti júrgizýshini toqtatý maqsatynda jáne basqa jol-kólik oqıǵalaryn boldyrmaý úshin ınspektor kóliktiń jolyn jaýyp tastaǵanymen er adam kóligin toqtatpaı, polıtseıdi ilip áketip, birneshe metrge súırep ótken.

Sottalýshyǵa taǵylǵan aıyp jınaqtalǵan qujattarmen dáleldenedi.

— Jaza taǵaıyndaý barysynda sottalýshynyń qylmystyq jaýapkershiligi men jazasyn jeńildetetin mán-jaı retinde jasaǵan áreketine ókinip, eki jasóspirim balasynyń bolýy qarastyryldy. Aýyrlatatyn mán-jaı qylmysty esirtkige masań halde jasaǵany bolyp otyr. Sot sottalýshyny QK-niń 380-baby 5-bóligi boıynsha kináli dep tanyp, oǵan 7 jyl merzimge bas bostandyǵynan aıyrý jazasyn taǵaıyndady. Úkim zańdy kúshine enbedi, — delingen Shymkent qalalyq sotynyń baspasóz qyzmeti usynǵan aqparatta.

Aıta keteıik, budan buryn Shymkentte polıtsııany kóligimen qaǵyp, qashyp ketken júrgizýshige qylmystyq is qozǵalǵanyn jazǵan bolatynbyz.