Polıtsııa qyzmetkerleri drondardy basqarý boıynsha daıyndyqtan ótip jatyr
ASTANA. KAZINFORM – Іshki ister organdaryn jańǵyrtý jáne tsıfrlyq transformatsııalaý aıasynda tártip saqshylary zamanaýı ushqyshsyz avıatsııalyq tehnologııalardy belsendi túrde meńgerip jatyr. ІІM-niń jedel-krımınalıstıkalyq departamenti bazasynda oqý-jattyǵý zerthanasy ashylyp, onda polıtsııa qyzmetkerleri drondardy basqarý boıynsha keshendi daıyndyqtan ótip jatyr, - dep jazdy Polisia.kz.
Oqytý birneshe kezeńnen turady: teorııalyq kýrs, mamandandyrylǵan sımýlıatorlardaǵy jumys jáne kompıýterlik tájirıbelik sabaqtar. Ushqyshsyz apparattardy naqty qyzmettik mindetterde qoldanýǵa erekshe nazar aýdarylady.
- Іshki ister mınıstriniń tapsyrmasymen jedel-krımınalıstıkalyq departamenttiń bazasynda ushqyshsyz avıatsııalyq júıelerdiń oqý-jattyǵý zerthanasy ashyldy. Bizdiń mindetimiz zamanaýı tehnologııalardy kúndelikti qyzmette senimdi ári tıimdi paıdalanatyn mamandardy daıarlaý, - dedi ІІM jedel-krımınalıstıkalyq departamentiniń bas krımınalısi Rollan Moldybaev.
Ushqyshsyz ushý apparattary polıtsııa qyzmetkerleriniń múmkindikterin edáýir keńeıtedi. Olar túngi baqylaý men áýe barlaýynda qoldanylady, kórsetý qabileti joǵary kameralarmen jáne jylý anyqtaǵysh qurylǵylarmen jabdyqtalǵan. Bul qarańǵy ýaqytta jáne kúrdeli aýa raıy jaǵdaıynda adamdardy tıimdi izdeýge múmkindik beredi. Drondar oqıǵa ornyn áýeden jedel sholyp, tergeý-jedel toby kelgenge deıingi jaǵdaıdy tirkeýge jáne mańyzdy aıǵaqtardy saqtaýǵa kómektesedi. Sonymen qatar ushqyshsyz apparattar taýly aımaqtar, dalaly alqaptar jáne qaraýsyz qalǵan nysandar sııaqty jetýi qıyn aýmaqtardy tekserý úshin paıdalanylady.
Bul joǵalǵan azamattardy izdeý tıimdiligin arttyryp qana qoımaı, izdeýde júrgen adamdardy baqylaý men ustaý kezinde jasyryn ári qaýipsiz baǵdar júrgizýge múmkindik beredi. Tehnologııalardyń praktıkalyq tıimdiligi óńirlerde óz nátıjesin kórsetip otyr. Mysaly, Túrkistan oblysynda drondy paıdalaný mal urlyǵyn jedel ashýǵa kómektesti: kúdiktiler anyqtalyp, olardyń qozǵalysy tirkeldi. Sondaı-aq urlanǵan múlikti satyp alýshyny anyqtaýǵa múmkindik bergen dálelder jınaldy.
Ushqyshsyz ushý tehnologııalaryn engizý zamanaýı polıtsııany damytýdaǵy mańyzdy qadamǵa aınalyp, áreket etý jedeldigin, jumys dáldigin jáne qoǵamdyq qaýipsizdiktiń jalpy deńgeıin arttyrýǵa yqpal etip otyr.
Aıta keteıik, Abaı polıtsııasy drondardyń kómegimen Alakól tasjolynda baqylaýdy kúsheıtti.
