Polıtsııa qyzmetkeri órtenip jatqan páterge kirip, 5 balany qutqaryp qaldy
ASTANA. KAZINFORM – Qaraǵandyda eńbek demalysynda júrgen polıtsııa qyzmetkeri órtke oranǵan páterden bes balany qutqaryp, iri qaıǵyly oqıǵanyń aldyn aldy.
Oqıǵa búgin qaladaǵy kópqabatty turǵyn úılerdiń birinde boldy. Úıine qaıtyp kele jatqan Qaraǵandy qalalyq polıtsııa basqarmasy patrýldik polıtsııa polkiniń aǵa ınspektory Dinmuhamet Sultan segizinshi qabattaǵy páterdiń terezesinen shyqqan qoıý tútindi baıqaǵan. Jaǵdaıdyń asa qaýipti ekenin birden túsingen tártip saqshysy esh oılanbastan oqıǵa ornyna qaraı júgirdi.
Qaýipke qaramastan joǵary qabatqa kóterilgen ol qoıý tútinge tolǵan páterge kirip, ishinde qalyp qoıǵan bes balany tapty.
Polıtseıdiń batyl áreketi men kásibıliginiń arqasynda balalar qysqa ýaqyt ishinde qaýipsiz jerge shyǵaryldy. Balalardyń ómirine esh qaýip joq ekenine kóz jetkizgen soń Dinmuhamet Sultan qaıtadan jalyn sharpyǵan páterge oraldy.
Aldymen elektr qýatyn ajyratyp, órttiń odan ári órshýine sebep bolýy múmkin qysqa tuıyqtalýdyń aldyn aldy. Keıin eki beıjaı qaramaǵan turǵynmen birge órt sóndirýshiler kelgenge deıin asúıdegi órt oshaǵyn sóndirýge kiristi.
Polıtseıdiń der kezinde jasaǵan sheshýshi áreketteriniń arqasynda adam shyǵynyna ákelýi múmkin qaıǵyly jaǵdaıdyń jáne iri órttiń joly kesildi.
ІІM baspasóz qyzmeti málimetinshe, Dinmuhamet Sultannyń bul erligi onyń qyzmettik mindetin atqarý kezinde emes, kezekti eńbek demalysynda júrgen sátinde boldy. Soǵan qaramastan ol polıtsııa qyzmetkerine tán kásibılik pen azamattyq jaýapkershiliktiń jarqyn úlgisin kórsetti.
Erjúrek polıtseıdiń erligi týraly qutqarylǵan otbasynyń kórshisi habarlap, balalardyń ómirin saqtap qalǵany úshin shynaıy alǵysyn bildirdi.
Bul oqıǵa – polıtsııa qyzmetkeri úshin antqa adaldyq pen halyqqa qyzmet etý uǵymynyń jumys ýaqytymen shektelmeıtininiń taǵy bir dáleli.
Buǵan deıin Ulttyq ulan ofıtseri sýǵa batyp bara jatqan balany qutqarǵanyn jazǵan edik.
