Polıtsııa Qyzylorda-Aqtóbe baǵytyndaǵy jolda drondardy iske qosty
QYZYLORDA. KAZINFORM — Qyzylorda oblysynda «Qaýipsiz jol» jedel-profılaktıkalyq aılyǵy bastaldy.
Aılyqtyń alǵashqy 4 kúninde 1454 óreskel quqyq buzý deregi tirkeldi. Onyń ishinde qaýipsizdik beldigin taqpaý, tasymaldaý qaǵıdalaryn saqtamaý (299), jaıaý júrginshiler jolaǵynan ótpeý (104), mindetti saqtandyrý zańnamasynyń talaptaryn elemeý (87), kólik tizgininde kele jatyp uıaly telefon paıdalaný (75), mindetti tehnıkalyq tekseristen ótpeý (69) sııaqty jaǵdaılar jıi kezdesti. Sonymen qatar 137 avtokólik aıyp turaǵyna qoıylyp, 48 temir tulpardyń memlekettik tirkeý belgileri alynyp, júrýine shekteý qoıyldy.
— Taldaý nátıjesi respýblıkalyq mańyzy bar Qarabutaq-Qyzylorda-Shymkent avtojolynda, ıaǵnı Qyzylorda-Aqtóbe baǵytynda joldyń ekijolaqty bolýy sebepti kólikterdiń bir-birinen ozýǵa umtylýy, joldyń qarama-qarsy baǵytyna shyǵyp ketýi sııaqty jaǵdaılar kóbeıgen. Osyǵan baılanysty ushqyshsyz ushý apparattary qoldanyla bastady. Drondar arqyly 50-ge jýyq óreskel quqyqbuzýshylyq anyqtaldy, — dedi Qyzylorda oblystyq polıtsııa departamenti jergilikti polıtsııa qyzmeti basqarmasy bastyǵynyń orynbasary, polıtsııa podpolkovnıgi Muratbek Manatov.
Jyl basynan beri óńirde 233 jol apaty tirkelip, sonyń saldarynan 17 adam kóz jumdy. 307 adam dene jaraqatyn alǵan.
Aıta keteıik, Qyzylorda-Aqtóbe tasjoly eki jolaqtan turady jáne bul jerden júk kólikteri kóp ótedi. 3 myń kólikke arnalǵan jolda qazir 16 myń kólik qatynap júr. Osyǵan baılanysty da jol apaty tyıylmaı tur.