Polıtsııa keıingi eki aıda 17 tonna janar-jaǵarmaıdyń zańsyz shyǵarylýyna tosqaýyl qoıdy
ASTANA. KAZINFORM - Qazaqstan Respýblıkasy Іshki ister mınıstrligi munaı ónimderi men janar-jaǵarmaıdy el aýmaǵynan zańsyz shyǵarýdyń aldyn alý baǵytyndaǵy jumystardy turaqty túrde júrgizip keledi, - dep habarlaıdy Polisia.kz.
Janar-jaǵarmaıdy zańsyz áketý faktileri jıi tirkeletin shekara mańyndaǵy aımaqtarda patrýldik polıtsııanyń 59 beketi jumys isteıdi.
Bul beketterde zańsyz janar-jaǵarmaı tasymaldaýdy, onyń ishinde jol talǵamaıtyn kólikterdi paıdalaný arqyly júzege asyrylatyn zańsyz áreketterdi anyqtaýǵa erekshe nazar aýdarylady.
Kólemi ulǵaıtylǵan janarmaı baktarymen jabdyqtalǵan kólik quraldarynyń basym bóligi Jambyl oblysynda tirkelgen. Qordaı aýdanynda konstrýktsııasy óz betinshe ózgertilgen avtobýs anyqtaldy.
Tekserý barysynda árqaısysynyń syıymdylyǵy 600 lıtr bolatyn jasyryn qosymsha baktar tabyldy. Tek sońǵy eki aıdyń ishinde polıtsııa qyzmetkerleri shamamen 17 tonna janar-jaǵarmaıdyń zańsyz shyǵarylýyna tosqaýyl qoıdy.
Qaıta jabdyqtalǵan janarmaı baktary bar 87 avtokólik anyqtalyp, olardyń ıeleri ákimshilik jaýapkershilikke tartyldy. Sonymen qatar kólikterdi zańsyz qaıta jabdyqtaýmen aınalysatyn tehnıkalyq qyzmet kórsetý stantsııalarynyń qyzmetin anyqtaý boıynsha jumystar júrgizilip jatyr.
Polıtsııa qyzmetkerleri memlekettik kirister organdarynyń ókilderimen birlesip, qosymsha janarmaı baktaryn ornatýmen aınalysatyn 16 tehnıkalyq qyzmet kórsetý stantsııasyn tekserdi.
Tekserý qorytyndysy boıynsha alty nysan ıesine qatysty ákimshilik materıaldar jınaldy.
Іshki ister mınıstrligi memlekettiń ekonomıkalyq qaýipsizdigin qamtamasyz etýge baǵyttalǵan keshendi sharalardy júzege asyrýdy jalǵastyrady, onyń ishinde munaı ónimderi men janar-jaǵarmaı materıaldarynyń el aýmaǵynan zańsyz shyǵarylýyna jol bermeý de bar.
Bul jumys Іshki ister mınıstriniń erekshe baqylaýynda.
Osyǵan deıin shekarada munaı ónimderiniń zańsyz tasymalyna tosqaýyl kúsheıtilgeni týraly jazdyq.
