Polıtsııa ınternet-alaıaqtyqtyń jańa túri týraly eskertti
ALMATY. KAZINFORM – Almaty qalasynyń polıtsııa departamenti turǵyndardy ınternet-alaıaqtyqtyń jańa túri týraly aıtyp berdi.
Polıtsııa málimetinshe, jol qozǵalysy erejesin buzǵany úshin júrgizýshilerge jalǵan aıyppul týraly hat kelip, kúmándi silteme jiberiledi.
- Qaskóıler avtokólik ıelerine elektrondyq poshta nemese messendjerler arqyly hat pen habarlamalar jiberedi. Onda júrgizýshiniń jeke derekteri, kólik nómiri jáne «aıyppuldy tóleýge arnalǵan» silteme kórsetiledi. Eger adam bank kartasynyń derekterin engizse, alaıaqtar onyń esepshotyna qol jetkizedi. Keı jaǵdaılarda silteme arqyly jeke derekterdi urlaıtyn vırýstar da taralady. Mundaı shabýyldar AQSh pen Reseıde tirkelgen, al endi olardyń Qazaqstanda taralý qaýpi bar», – dedi Almaty qalasy Kıberqylmysqa qarsy kúres basqarmasynyń bastyǵy Ánes Qaldybaev.
Polıtsııa resmı aıyppul týraly habarlama tek 1414 nómirinen keletinin jáne eshqashan tólem jasaýǵa arnalǵan silteme bolmaıtynyn eske saldy. Aıyppuldardy egov.kz, qamqor.gov.kz saıttarynda nemese bankterdiń mobıldi qosymshalary arqyly tekserýge bolady.
Eske salaıyq, buǵan deıin atyńyzǵa alaıaqtyq kredıt resimdelse, ne isteý kerek ekenin jazǵanbyz.