Polıtsııa fýtbol matchy qarsańynda jankúıerlerge úndeý jasady
ASTANA. KAZINFORM — «Qaırat» jáne «Ordabasy» komandalary arasyndaǵy fýtbol matchy qarsańynda Almaty qalasy polıtsııa departamenti jankúıerlerdi qoǵamdyq tártipti saqtap, ózara qurmetke negizdelgen atmosfera qalyptastyrýǵa shaqyrdy
Aldaǵy kezdesý kópten kútken sporttyq oqıǵalardyń biri bolyp, stadıonǵa myńdaǵan kórermen jınaıdy.
Qatysýshylar men jankúıerlerdiń qaýipsizdigin qamtamasyz etý úshin kúsheıtilgen polıtsııa jasaqtary, Ulttyq ulannyń áskerı qyzmetshileri jáne basqa da beıindi qyzmetter jumyldyrylady.
Stadıon aýmaǵynda jáne oǵan irgeles ýchaskelerde zamanaýı beınebaqylaý jáne baqylaý quraldary da paıdalanylady. Qoǵamdyq tártiptiń yqtımal buzylýynyń aldyn alýǵa erekshe nazar aýdaryldy. Polıtsııa qyzmetkerleri kórermenderdi arandatýǵa ermeı, zań talaptaryn saqtaýǵa, aınalasyndaǵylarǵa qurmetpen qaraýǵa jáne óz komandalaryn tek sport mádenıeti aıasynda qoldaýǵa shaqyrady.
Polıtsııa agressıvti minez-qulyq, tyıym salynǵan atrıbýtıkany paıdalaný, bylapyt sózder aıtý jáne janjal týǵyzýǵa áreket jasaý sııaqty kez kelgen quqyqqa qaıshy áreketke Qazaqstan Respýblıkasynyń zańnamasyna sáıkes quqyqtyq baǵa beriletinin eske salady.
— Qoldaý kórsetý úshin Almatyǵa kelgen barlyq jankúıerdi qýana qarsy alamyz. Bizdiń ortaq mindetimiz — bul matchtyń ádemi oıynmen, jarqyn emotsııalarmen jáne bir-birine degen qurmetpen este qalýyn qamtamasyz etý. Barshańyzdy qoǵamdyq tártipti saqtaýǵa, arandatýǵa ermeýge jáne naǵyz jankúıerdi minez-qulyq mádenıeti, qarsylasqa degen qurmeti men óz komandasyna shynaıy qoldaý kórsetýi erekshelendiretinin este ustaýǵa shaqyramyz. Óz tarapymyzdan polıtsııa matchqa qatysýshylar men kórermenderdiń qaýipsizdigin qamtamasyz etý úshin barlyq qajetti sharalardy qabyldaıdy, — dep atap ótti Almaty qalasy polıtsııa departamenti qoǵamdyq qaýipsizdik basqarmasynyń bastyǵy Tımýr Noǵaıbaev.
