Kóshedegi kúmándi QR-kodtardan saq bolyńyz: polıtsııa turǵyndarǵa eskertý jasady
ASTANA.KAZINFORM — QR-kodtar búginde kúndelikti ómirimizdiń bir bóligine aınaldy. Alaıda alaıaqtar da osy tehnologııany óz paıdasyna qoldanyp, azamattardy aldaýdyń jańa tásilderin qoldanyp jatyr, dep habarlaıdy Polisia.kz.
-Kóshede, aıaldamalarda, podezderde nemese jarnama ilýge arnalǵan taqtaıshalarda ornalasqan QR-kodtardy skanerlemes buryn olardyń qaýipsiz ekenine kóz jetkizińiz. Sebebi qylmyskerler túpnusqa kodtyń ornyna ózderiniń jalǵan QR-kodyn japsyryp, adamdardy qaýipti saıttarǵa baǵyttaýy múmkin. Mundaı siltemelerdiń maqsaty ártúrli bolýy yqtımal. Sizdiń jeke málimetterińizdi nemese bank kartalarynyń derekterin alýǵa tyrysady. Kóp jaǵdaıda azamattar tólemdi durys jasadym dep oılaǵanymen, qarajat alaıaqtardyń esepshotyna aýdarylyp ketedi, -delingen habarlamada.
Kúmándi QR-kodtardyń negizgi belgileri:
— QR-kod basqa jarnamanyń ústine japsyrylǵan;
— habarlandyrýda resmı emes bezendirý bolýy múmkin;
— «Syılyq alyńyz», «Tek búgin», «Jedel skanerleńiz» sııaqty asyqtyratyn mátinder jazylǵan;
— uıymnyń ataýy nemese baılanys derekteri kórsetilmegen.
Ózińizdi qalaı qorǵaýǵa bolady?
- belgisiz QR-kodtardy sebepsiz skanerlemeńiz;
- silteme ashylar aldynda onyń ınternet-mekenjaıyn muqııat tekserińiz;
- kúmándi saıttarǵa jeke derekterińizdi, bank kartasynyń málimetterin nemese SMS arqyly kelgen rastaý kodtaryn engizbeńiz;
- belgisiz qosymshalardy ornatýǵa nemese qurylǵyǵa qosymsha ruqsattar berýge kelispeńiz;
- tólem jasaý kezinde QR-kodtyń resmı uıymǵa tıesili ekenine kóz jetkizińiz.
- Eger kúmándi QR-kodty skanerlep, jeke nemese qarjylyq derekterińizdi engizip qoıǵan bolsańyz, bankke dereý habarlasyp, kartańyzdy buǵattańyz.
Polıtsııa barsha azamatty saq bolýǵa shaqyrady!
Osyǵan deıin jańa zań normasy talapty kúsheıtkeni týraly jazdyq.
